Лидерот на Социјалистичката партија на Шпанија, Педро Санчез, денеска успеа да стигне до 167 гласа „за“ наспроти 165 „против“ во 350-члениот парламент што е доволно за да формира влада. Ова беше втор обид во кој на Санчез му беше доволно просто мнозинство откако во неделата не стигна до апсолутно мнозинство (најмалку 176 гласа). Клучно за денешниот успех на Санчез беше воздржувањето од гласање на 18 пратеници од баскиските и каталонските националисти што го намали неопходниот број на гласови за просто мнозинство. Изборот на влада означува крај на долгата политичка криза во Шпанија по двата изборни циклуса (во април и ноември 2019 г.) без јасен победник. Тоа треба да овозможи и завршување на процедурата за ратификација на протоколот за членство на Северна Македонија во НАТО. Шпанија е единствена од 29-те земји-членки на Алијансата што не го ратификувала членството на земјава.
Во продолжение погледнете како низ неколку фотографии шпанскиот весник „Ел Паис“ го раскажа денешното гласање во шпанскиот парламент.
1.
Педро Санчез аплаудира по тесната победа во шпанскиот парламент, која означува и крај за осуммесечната техничка влада, со која раководеше, исто така, тој.
2.
Педро Санчез се прегрнува со лидерот на крајно-левичарската коалиција Унидас Подемос, Пабло Иглесиас, кој ќе биде вицепремиер во новата влада. Ова е првпат во модерната демократска историја на Шпанија, државата да ја води коалициска влада.
3.
Лидерот на Унидас Подемос, Пабло Иглесиас, чија групација има 30 пратеници во парламентот, со солзи радосници по изгласувањето доверба за Педро Санчез. Договорот Санчез – Иглесиас, меѓу другото, предвидува зголемување на даноците за оние што заработуваат повеќе од 130.000 евра годишно.
4.
Лидерот на десничарската Народна партија, Пабло Касадо, му честита на Санчез за изборот за премиер. Најголемата опозициска партија го обвини Санчез за предавство на националните интереси со политичкиот договор за индиректна поддршка од каталонските сепаратисти.
5.
Аина Видал, пратеничка од Унидас Подемос, дојде денеска да гласа и покрај тоа што е болна од агресивен канцер. Колегите и подарија букет цвеќе. Педро Санчез, свесен дека секој глас е важен, побара од пратениците од неговата партија во понеделникот да спијат во Мадрид за да избегнат можни сообраќајни проблеми на пат кон парламентот.
6.
Монсерат Баса, од сепаратистичката каталонска партија ЕЦР, во говорот пред гласањето порача: „Баш ми е гајле за управувањето со Шпанија“. Нејзината сестра минатата година беше осудена на 12 години затвор поради улогата во сецесионистичките настани во 2017 година. Воздржувањето од гласање на пратениците од нејзината групација беше клучно за Санчез да стигне до просто мнозинство.
7.
Единствениот пратеник на „Теруел постои“, Томас Гуитарте, се ракува со премиерот Педро Санчез. Гуитарте, кој претходно најави дека ќе го поддржи Санчез, рече дека бил цел на жестоки притисоци и напади на социјалните мрежи пред гласањето во обид да биде премислен. Неговата политичка групација се залага за пофер третман на регионот Теруел од централната власт.