Со тесно мнозинство во парламентот, социјалистот Педро Санчез доби зелено светло да формира влада во коалиција со екстремно левиот Подемос.
Довербата ја доби со 167 гласа спрема 165. Воздржаноста на пратениците од Каталонија и Баскија одигра клучна улога за Санчез да формира малцинска влада.
Тоа ќе биде прва коалициска влада на Шпанија од 1978 година, по диктатурата на Франко.
Санчез најави дека инаугуративниот состанок на кабинетот ќе го одржи в петок.
Шпанскиот парламент брои 350 пратеници, при што Социјалистичка партија на Санчез (ПСОЕ) има 120 места, а Подемос 35, што е помалку од потребното мнозинство. Поради тоа, воздржаноста на пратениците од Каталонија и Баскија одигра голема улога во денешното гласање.
Формирањето на владата во Мадрид ќе го отвори патот за ратификација на протоколот со кој нашата држава официјално ќе стане 30-та членка на НАТО, бидејќи Шпанија е единствена држава која сè уште го нема направено тоа.
Во меѓувреме, владата поднесе предлог-закон за предвремена ратификација кој е во процедура, со кој се предвидува предвремена ратификација на Протоколот со одложено дејство во случај ратификацијата во Шпанија да не биде завршена пред распуштањето на нашето Собрание во февруари.