Министерот за внатрешни работи на Франција вели дека 57 полицајци се повредени откако демонстрантите подметнале пожари и вандализирале продавници во околу 15 градови
Француската полиција уапсила 780 лица вклучени во насилните судири во Париз и други француски градови што избувнаа вчера вечер откако Пари Сен-Жермен (ПСЖ) го победи Арсенал и ја освои титулата во Лигата на шампионите, објави „Гардијан“.
Министерот за внатрешни работи, Лоран Нуњез, изјави дека 57 полицајци се повредени, а повеќето се здобиле со полесни повреди, додека фудбалските навивачи предизвикувале пожари и вандализирале продавници. Една мала група дури се обидела да упадне во полициска станица во Париз.
На прес-конференцијата денеска тој рече дека ситуацијата во голема мера е ставена под контрола.
„Поголемиот дел од прославите се одржаа мирно низ француската престолнина“,
рече тој, истакнувајќи дека повеќето инциденти се случиле во близина на стадионот „Парк на принцовите“, каде што навивачите се собрале да го гледаат натпреварот.
Полицијата, исто така, интервенирала пет пати во текот на ноќта за да ги спречи луѓето да го блокираат сообраќајот на главната кружна улица околу Париз, рече тој. Од 780-те приведени, дури 480 се само во областа на Париз.
Канцеларијата на парискиот обвинител соопшти дека 277 лица биле формално приведени, вклучувајќи 82 малолетници, за наводни прекршоци. Повеќето биле за напад врз полицајци, додека други обвинувања вклучувале кражба, вандализам и нарушување на јавниот ред.
Сепак, Нуњез рече дека планираните прослави за победата на тимот, во близина на Ајфеловата кула, ќе се одржат според планот, а тимот на ПСЖ ќе биде угостен од францускиот претседател, Емануел Макрон, во Елисејската палата.
Инаку, снимки емитувани од информативниот канал БФМ (BFM), покажуваат кратки судири околу „Паркот на принцовите“ – стадионот на ПСЖ во западен Париз, каде вчера вечер повеќе од 40 000 луѓе на огромни екрани го следеа финалето на „Пушкаш Арена“ во Будимпешта, во кој нивниот тим успеа да ја одбрани титулата европски клупски шампион.
До 23 часот, полицијата извршила повеќе од 130 апсења, а портпаролот на париската полиција за Ројтерс изјавил дека во нередите биле оштетени шест возила и излози на две продавници.
Според извештаите на дел од медиумите во Франција, некои навивачи на ПСЖ насочиле огномети кон полицајците кои возвратиле со солзавец за време на прославата на победата.
Како што пренесуваат агенциите, можел да се види и чад како се издига од неколку области за време на судирите, а полицијата во опрема за справување со немири била забележана како трча по група навивачи и ги гасне пиротехничките средства фрлени по улиците.
Француските власти, според извештаите, распоредиле 22 000 полицајци за да го одржат редот во главниот град, со цел да спречат реприза на минатогодишните немири кога две лица загинаа, а речиси 200 повредени при прославата на првиот триумф во Лигата на шампиони на УЕФА на ПСЖ, кој лани го совлада Интер од Милано во големото финале.