„Ме видовте за време на ковид како правам сè што можам за да ги заштитам луѓето и бизнисите. Владата што ќе ја предводам нема да ја остави следната генерација, вашите деца и внуци. Ќе ја обединам нашата земја не со зборови туку со дела. Ќе работам од ден на ден за да ви испорачам. Оваа влада ќе има интегритет, професионализам и одговорност на секое ниво. Посилен Национален здравствен систем, подобри училишта, побезбедни улици, контрола на нашите граници, заштита на нашата животна средина, поддршка на нашите вооружени сили, изградба на економија која ги прифаќа можностите на брегзит, каде што бизнисите инвестираат, иновираат и создаваат работни места“, рече Сунак
Риши Сунак денеска и официјално стана нов пример на Велика Британија, по аудиенцијата кај кралот Чарлс Трети на која и формално го доби мандатот за состав на новата влада на Обединетото кралство.
На аудиенцијата во Бакингемската палата, Чарлс Трети го повика новиот лидер на ториевците да ја формира владата откако претходно ја прифати оставката на Лиз Трас, која на функцијата се задржа само 45 дена и со тоа стана премиер со најкраток стаж во историјата на Велика Британија.
Како што пренесе Би-би-си, Сунак во својот прв премиерски говор пред Даунинг стрит 10 истакна дека врвот на својата владина агенда ќе ги стави економската стабилност и довербата, но и дека тоа значи оти ќе се носат тешки одлуки.
„Во моментов, нашата земја се соочува со длабока економска криза. Последиците од ковид сè уште траат, а војната во Украина ги дестабилизираше пазарите ширум светот“,
рече Сунак во својот говор.
Тој, како што пренесува „Гардијан“, истакна дека Лиз Трас била во право што сакала да го подобри растот и дека тоа била „благородна цел“.
Но, беа направени грешки, истакна Сунак, посочувајќи дека тој е избран за премиер за да ги поправи тие грешки.
„Ме видовте за време на ковид како правам сè што можам за да ги заштитам луѓето и бизнисите. Владата што ќe ја предводам нема да ја остави следната генерација, вашите деца и внуци. Ќе ја обединам нашата земја не со зборови, туку со дело. Ќе работам од ден на ден за да ви испорачам. Оваа влада ќе има интегритет, професионализам и одговорност на секое ниво. Посилен Национален здравствен систем, подобри училишта, побезбедни улици, контрола на нашите граници, заштита на нашата животна средина, поддршка на нашите вооружени сили, изградба на економија која ги прифаќа можностите на Брегзит, каде што бизнисите инвестираат, иновираат и создаваат работни места“,
рече Сунак.
Новиот британски премиери посочи дека разбира во колку тежок период стапува на функцијата и дека има многу работа за да ја врати довербата.
„Сè што можам да кажам е дека не се плашам. Ја знам високата функција што ја прифатив и се надевам дека ќе ги исполнам нејзините барања. Но, кога ќе се појави можност да служите, не можете да го доведете во прашање моментот, туку само вашата волја. Затоа стојам овде пред вас подготвен да ја водам нашата земја во иднината. Да ги ставам вашите потреби над политиката, да подадеме рака и да изградиме влада што ги претставува најдобрите традиции на мојата партија“,
истакна Сунак.
Тој потенцира дека „заедно можеме да постигнеме неверојатни работи“.
„Ќе создадеме иднина достојна за жртвите што многумина ги направија и ќе го исполниме утрешниот и секој ден потоа со надеж“,
порача новиот британски премиер.
Дел од британските медиуми, неговиот прв премиерски говор го оценија како обраќање кое веројатно нема да се памети долго, но велат дека тонот бил добредојден, сериозен и искрен, особено во делот каде зборува за грешките направени од неговите претходници, Лиз Трас и Борис Џонсон, на кои Сунак им искажа благодарност во своето обраќање.
Околу тривијалностите, Би-би-си наведува дека првиот говор на Риши Сунак како премиер траел речиси шест минути, поточно пет минути и 56 секунди, што е подолго од сите еквивалентни говори на премиерите во последните децении, освен Борис Џонсон кој во 2019 година зборувал 11 минути и 13 секунди.
Инаугуративниот говор на Трас на 6 септември траеше нешто повеќе од четири минути.
Риши Сунак ќе биде 57. премиер на Велика Британија. Првиот што има азиски корени, еден од најбогатите премиери досега, но и најмладиот што го имала оваа земја уште од 1812 година.