Европскиот амбасадор Самуел Жбогар ги предаде на Министерството за здравство првите 12 мeханички вентилатори и 5 000 заштитни маски од ЕУ, за зајакнување на капацитетите на здравствениот систем во борбата со коронавирусот.
Ова е прва испорака од најавената поддршка од Европската Унија во вредност од 4 милиони евра за итна набавка на неопходна медицинска опрема и материјали.
„Ќе имаме дополнителни испораки во следните недели. Ја поддржуваме и ќе продолжиме да ја поддржуваме земјата и граѓаните во надминување на овој заеднички предизвик“,
изјави амбасадорот Жбогар.
Здравствените власти најавија дека со поддршка на ЕУ ќе се набават вкупно 20 механички вентилатори, 20 монитори за интензивна нега, 626 сета за 31 300 тестови и близу 40 000 парчиња разна медицинска опрема како кислородни маски, филтри, катетри и други неопходни материјали за потребите на здравствениот сектор.
„Во оваа прва фаза на проектот, Министерството за здравство доби 12 комплетно нови машини за механичка вентилација, кои ќе бидат ставени на располагање за третман на најкомплексните случаи на Клиниката за инфективни болести и фебрилни состојби и во ГОБ 8 Септември во Скопје, како и 5,000 заштитни маски FFP2 кои се дел од личната заштитна опрема на здравствените работници“,
изјави заменик министерот за здравство Арслани.