Од утре треба да започне масовната имунизација во регионалните центри за вакцинација во шест општини каде изминатиов период беа опремени спортски сали.
Штип, Охрид, Кавадарци, Тетово, Куманово и Охрид ќе бидат регионални центри, а локалните власти во текот на денот објавија дека спортските објекти се подготвени, а вакцините пристигнати.
Во Штип имунизацијата за граѓаните од источниот регион ќе се одвива во салата „Јордан Мијалков“. Како што јави дописничката на МИА, од штипскиот здравствен дом изјавите дека денеска претпладне се пристигнати 5 000 вакцини на „Синофарм“, сместени се во фрижидерите во салата и објектот го обезбедува полиција. Во овој регионален центар ќе бидат ангажирани 50 медицински сестри, осум лекари, 16 администратори, кои се студенти на Универзитетот „Гоце Делчев“ и волонтери од Црвен крст-Штип. Во оваа сала има 22 вакцинални пунктови, дневно ќе се имунизираат од 1 000-2 000 граѓани.
Во Кавадарци имунизацијата ќе се одвива во салата „Јасмин“. Дистрибуирани се 5 100 вакцини за граѓаните од Кавадарци, но и од Велес, Неготино, Демир Капија, Валандово, Гевгелија, Градско, Росоман.
Подготвен е и регионалниот центар во Битола, каде во петок е изведена и симулација како ќе се одвива вакцинирањето.
„Целосно ја подготвивме спортската сала (простории, паравани, компјутери и друга опрема) во медицинското училиште како регионален центар за вакцинација. Во петокот е изведена и симулација односно подготовка на луѓето вклучени во спроведувањето на вакцинацијата. Денес пристигнаа и вакцините. Нека ни е со лесно целиот процес и исполнета желбата што побрзо да излеземе од пандемијата“,
објави денеска градоначалничката на Битола, Наташа Петровска.
Теренот е подготвен и во Тетово, каде денеска пристигнаа 4 2000 вакцини од „Синофарм“.
Салата „Билјанини избори“ ќе биде место за имунизација за охриѓани, но и за граѓаните од Струга, Дебарца, Вевчани, Дебар, Ресен и Кичево.
„Денеска пристигна првата пратка од 7200 вакцини од производителот ’Синофарм‘. Дистрибуцијата на предвидените дози наменети за регионалниот центар ќе се одвива последователно во зависност од капацитетот и условите за чување. Регионалниот центар во Охрид располага со 14 приемни пунктови и 28 вакцинални места. Опремен е со 14 паравани, ладилник за вакцините, нов агрегат за ладилникот, комплетна компјутерска опрема и оптички интернет за потребите на компјутерскиот центар за евиденција на граѓаните“,
објави денеска градоначалникот на Охрид, Константин Георгиевски.
Масовната вакцинација преку регионални центри следува откако во петокот (30 април) во земјава пристигна пратка од 200 000 кинески вакцини од „Синофарм“.
Утре во посета на земјава, пак, ќе биде еврокомесарот за проширување Оливер Вархеји по повод пристигнувањето на вакцините од ЕУ. Европската комисија и Австрија на 20-ти минатиот месец објавија дека вкупно 651 000 дози на вакцините „Фајзер“ ќе бидат доставени на регионот, а од нив, 119 123 вакцини ќе бидат за Северна Македонија.