Во наредните денови вакцините ќе бидат дистрибуирани во пунктовите во шест градови во земјава, а вакцинацијата ќе започне од вторник. Дневно ќе се вакцинираат по 10 до 15 илјади луѓе
Филипче рече дека во наредниот период ќе стигнат уште 500 0000 вакцини на „Синовак“, 100 000 вакцини од „Синофарм“, како и уште 26 000 од „Фајзер“
Со асистенција на припадници на Армијата, кинеските вакцини утрово беа складирани во ладната соба во поликлиниката „Јане Сандански“ во Скопје. Станува збор за пратка од 200 000 вакцини на „Синофарм“ кои се купени со директни преговори со производителот, а со кои од следната недела и официјално ќе започне масовната имунизација на населението.
Министерот за здравство, Венко Филипче, кој ја пречека пратката заедно со кинескиот амбасадор Џанг Sуо, рече дека во наредните денови вакцините ќе бидат дистрибуирани во пунктовите за масовна вакцинација во шест градови, а вакцинацијата ќе започне од вторник. Дневно ќе се вакцинираат по 10 до 15 илјади луѓе.
„Оттука во текот на следните денови вакцините ќе бидат дистрибуирани во сите вакцинални пунктови за масовна вакцинација, во Скопје во салата „Борис Трајковски“ и во спортските сали во Куманово, Битола, Штип, Кавадарци, Тетово и Охрид и според распоредот на веќепријавени граѓани вакцинацијата ќе започна во вторник. Ова е месец во којшто очекуваме и други големи количини на вакцини и верувам дека до почетокот на летото ќе имаме висок процент на вакцинирано население и тоа ќе придонесе до целосно менување на сликата на епидемијата кај нас,“
порача Филипче.
Приоритет ќе имаат граѓаните коишто се веќе пријавени за вакцинација, а ќе бидат повикани според возраста. Засега, вели Филипче остануваат да функционираат и помалите пунктови за вакцинација, но се разгледува опција кадарот да се сконцентрира само во големите пунктови.
„Акцент ќе се стави на граѓаните кои се веќе пријавени, според возраста и според приоритетот на пријавување. Ја разгледуваме можноста помалите пунктови од другите градови да го дадат кадарот за да функционираат само големите пунктови, засега останува паралелно да функционираат двата системи. Ако некаде се укаже потреба, може да се сконцентрира експертизата на едно место“,
рече Филипче.
Филипче рече дека во наредниот период ќе стигнат уште 500 0000 дози на вакцината на „Синовак“, 100 000 дози од „Синофарм“, како и уште 26 000 од „Фајзер“.
„Се уште немаме точен термин за тоа кога и колкава количина ќе стигне од руските вакцини, а се понеизвесно станува пристигнувањето на вакцината на „Астра Зенека“ со оглед на лошата состојбата во Индија, земјата има забрана за извоз на вакцини, а дел од вакцините преку Ковакс системот треба да пристигнат и од институтот во Индија. Тоа може малце да ги искомплицира и одложи работите“,
кажа Филипче.