Во Прилеп се одржа карневалот „Прочка 2024“ на кој имаше стотици учесници. Познатите „Прилепски мечкари“ беа задоволни што годинава имало многу млади учесници за да ја продолжат вековната традиција. Утре ќе биде поделен посен ручек со грав во манастирот „Свети Ѓорѓија“ кај Прилеп, со што ќе биде означен почетокот на предвелигденските пости
Околу 500 учесници денеска дефилираа на прилепскиот карневал „Прочка 2024“. На булеварот во центарот на Прилеп карневалското дефиле го предводеа прилепските мечкари, заштитна маска на Карневалот и прогласена за нематеријално културно богатство од Министерството за култура. На дефилето имаше маски од Прилеп и од повеќе градови од земјава. Можеа да се сретнат групни маски на аватари, пирати, ткајачи, а гостуваа познатите Бамбурци од селото Ратево.
„Нашата маска е вековна. Млади момчиња рано наутро се собираме во селото и одиме во куќите за да го избркаме лошиот дух“,
рекоа маскираните Бамбурци од Ратево.
Прилепските мечкари велат дека се одржува и продолжува вековната традиција.
„Годинава сме околу 50 маскирани и многу ни е мило што имаме десетина млади кои ја продолжуваат традицијата“,
рекоа прилепските мечкари.
Прилеп е членка на меѓународната федерација на карневалски градови и со гордост ја одржува вековната традиција во маскирањето.
„Прилеп е горд на карневалот кој се одржува по 22. пат. Има одлични маски, расположението е прекрасно, карневалско. Иако годинава немаме гости од други земји, карневалот останува меѓународен и ги очекуваме догодина“,
рече Ванчо Георгиев, претседател на здружението „Прилепски мечкари“.
Карневалските свечености траеја три дена. Во петокот беа изложени преку 400 маски, креации на прилепските ученици, вчера напладне се презентираа обичаите за Прочка, а денеска маскираните ја претставуваа вековната традиција.
За време на карневалот угостителските објекти работат со продолжено работно време. Прилепските мечкари за утре ги поканија сите гости на заеднички посен ручек со грав во манастирот „Свети Ѓорѓија“ кај Прилеп, со што ќе биде означен почетокот на предвелигденските пости.