Причината за затворањето на дел од булеварите околу владината зграда е митингот што вечерва од 20 часот на платото пред Владата ќе го одржи ВМРО-ДПМНЕ. За блокирање на сообраќајот на улиците во овој дел од градот вчера информираа и од Министерството за внатрешни работи (МВР)
Еден часот попладне. Мирни и раздвижени скопски улици со по мал застој на семафорите. Оваа беше сликата што ја затекна екипата на „360 степени“ која попладнево беше во мини обиколка на градот за да провери каква е состојбата на најпрометните улици во центарот на Скопје во пресрет на најавата на МВР за посебен сообраќаен режим на крстосниците околу Владата.
Причината за затворањето на дел од булеварите околу владината зграда е митингот што вечерва од 20 часот на платото пред Владата ќе го одржи ВМРО-ДПМНЕ. За блокирање на сообраќајот на улиците во овој дел од градот вчера информираа и од Министерството за внатрешни работи (МВР).
„Поради подготовки и одржување на митинг, почнувајќи од денеска (03.04.2024) до утре (04.04.2024), односно до завршувањето на митингот, Единицата за безбедност на патниот сообраќај презема мерки за посебен режим на сообраќајот при што бул. ‘Илинден’, потегот од мост ‘Гоце Делчев’ до бул. ‘Климент Охридски’ и од бул. ‘Климент Охридски’ до мост ‘Гоце Делчев’, се затворени за сообраќај во двата правци“,
информираа вчера од МВР, додавајќи дека по потреба, ќе бидат затворени и други сообраќајници на поширокото централно подрачје.
Опрема за озвучување наместо автомобили
Обиколката ја започнавме од булеварот „Гоце Делчев“ во насока кон зградата на Владата. Го поминавме и мостот „Гоце Делчев“. Кон крајот на мостот и истоимениот булевар забележавме полициско возило кое го блокираше понатамошниот проток на возила кон булеварот „Илинден“ пред зградата на Владата.
Уште на почетокот на булеварот затекнавме дел од електронската опрема која се поставуваше во пресрет на митингот. На делот од улицата, паралелно со владиниот влез, имаше неколку комбиња со технички персонал кој ги местеше опремата и озвучувањето.
Бината од која ќе се случат обраќањата од вечерашниот митинг на ВМРО-ДПМНЕ е поставена кај семафорите на крстосницата на булеварот „Илинден“ и булеварот „Климент Охридски“. Во близина на бината имаше поставен билборд, чии плакати од двете страни беа испишани со изборни пораки од истоимената партија.
Вчера попладне, уште околу 15 часот, на истата локација скопјани извесен период беа заглавени во метежот кој настана поради стартот на подготовките за вечерашниот митинг. Исклучени беа неколку семафори, што создаде дополнителен метеж на улиците.
Барем до 16 часот, денеска такви гужви нема.