Засега има стабилни бројки и очекуваме да има се повеќе исписи на пациенти и да се намали приливот на нови болни, посочил министерот на состанок со директорите на клиники, од кои, сепак, побарал план за ослободување на дел од капацитетите за ковид-пациети доколку за тоа има потреба
Моменталната епидемиолошка состојба во однос на бројот на позитивни на ковид-19 и болни пациенти, пациенти кои побарале и имале потреба од хоспитализација, наспроти бројот на слободни места и капацитетите на клиниките, како и можноста за отворање нови ковид центри доколку за тоа има потреба… се прашањата што биле разгледувани на денешниот состанок на министерот за здравство Венко Филипче со директорите на сите клиники од клиничкиот комплекс „Мајка Тереза“ , соопштија од Министерството за здравство.
„Моментно, освен Клиниката за инфективни болести со модуларната болница во нејзин склоп и Институтот за белодробни заболувања ТБЦ, работат и четири ковид-центри – на клиниките за дерматовенерологија, неврологија, нефрологија и за гастроентерохепатологија. Деновиве се работи на средување на доводот на гас на клиниките за уво, нос и грло и на за очни болести, кои до крај на неделата се планира да почнат да примаат пациенти“,
рече Филипче.
Тој побара од директорите на хируршките клиники и директорот на Клиниката за кардиологија да достават план за ослободување на дел од капацитетите за ковид-пациети доколку за тоа има потреба во претстојниот период.
„Засега имаме стабилни бројки и, според епидемиолошката слика, очекуваме во периодот кој следи да има се повеќе исписи на пациенти и да се намали приливот на нови болни. Сепак, мора да бидеме подготвени за секакво сценарио“,
рече министерот .
На состанокот се разгледувал распоредот за ротација на лекари и на друг медицински персонал во ковид-центрите, каде што за тоа има потреба, притоа водејќи сметка да не запре редовната работа на хируршките клиники.
„Состојбата е сериозна и целиот здравствен персонал вложува натчовечки напор да го одржи системот и да ги згрижи сите пациенти. Ни претстои период во кој треба да останеме смирени и да го дадеме максимумот и како лекари и како институции“,
истакнал Филипче.
Во наредните неколку дена, како што се наведува во соопштението на МЗ, се очекува да се разгледаат предлозите за отворање на дополнителни капацитети на сите клиники.