Министерот за здравство Венко Филипче му се заблагодари на раководството на АД „Бутел“-Скопје затоа што излегло во пресрет за намалување на цените на погребните услуги за починати од коронавирусот.
„Вчера имавме разговор со директорот на претпријатието и денеска излегоа со соопштение“,
рече Филипче, посочувајќи потоа дека станува збор за приватно претпријатие.
По повеќе реакции во јавноста за повисоките трошоци за починати од ковид-19, од АД „Бутел“ најавија намалување на цените за погреб на починати од ковид-19 за седум илјади до 10 илјади денари.
Како што се посочува, протоколите за време на епидемии налагаат задолжителен лимен сандак, пластична вреќа во која се става телото на починатиот, како и залемувањето на двата сандака, што ги изложува граѓаните на големи давачки за погребни услуги.
Управниот одбор на АД „Бутел“ денеска донел одлука на вкупната фактура за погребни услуги да се минусираат до 10 илјади денари за случаи на починати од коронавирус.