На денешната прес-конференција тој демантира наводни провизии и истакна дека за да има такво нешто требало да има финансиска штета кон државата, а такво нешто нема бидејќи авансот е вратен, а процедурата е променета по насоките што ги добиле од кинеското МНР
Министерот за здравство Венко Филипче денеска ги отфрли сите обвинувања за случајот со набавката на кинеските вакцини објавени во, како што рече, медиумите блиски до ВМРО-ДПМНЕ и во италијанскиот „Ла Верита“.
Тој рече дека во изминатиот период е комуницирано со многу компании, со многу производители, користени се кинески компании кои работат кај нас за да се воспостави контакт со „Синофарм“, со која, како што рече, не било возможно директно да се комуницира.
На денешната прес-конференција тој демантира наводни провизии и истакна дека за да има такво нешто требало да има финансиска штета кон државата, а такво нешто нема бидејќи авансот е вратен, а процедурата е променета по насоките што ги добиле од кинеското МНР.
„Во целиот овој период се водиме до два принципи – внимателност и регуларност, и во таа смисла ги отфрлам сите обвинувања што ги има овие денови во дел од медиумите за нерегуларности и незаконски постапки и провизии. Жал ми е што излегоа во објави во медиуми блиски до ВМРО-ДПМНЕ, во ‘Ла Верита’, некои документи испратени до повеќе компании“,
рече Филипче.
Тој се осврна на целата процедура, почнувајќи од обидот за директен контакт со произведувачот, кој, како што рече, бил неуспешен, по што побарале помош од кинески компании што работат тука. Но, откако им било укажано од кинеското МНР дека треба да се смени процедурата, таа сега тече по нивни насоки и останува количината од 200 000 која државата ја нарачала од „Синофарм“.
„Се обидовме да го следиме тој регуларен пат и откако тоа не успеа сакавме да ја забрзаме постапката. Не станува збор за никакви незаконитости или нерегуларности, некакви провизии, за што овие денови нѐ обвинува опозицијата“,
рече Филипче.
Во делот на одговорноста за евентуалните реакции од вакцините за кои денеска „Ла Верита“ објави документи со обвинувања дека Филипче во едно од писмата ја ослободил кинеската компанија од одговорност, Филипче објасни дека ова важи за сите компании, и тоа е обврска на МЗ да преземе одговорност за реакции на производи, која произлегува од Програмата за имунизација и се однесува на секоја вакцина која влегува во државата.
Тој ја обвини опозицијата дека сака да го компромитира, наруши и загрози процесот на имунизација во земјата, односно дека некој сака политички бенефит и на сметка на здравјето на граѓаните.