Министерот за здравство Венко Филипче на денешната прес-конференција информираше дека според евиденцијата на Државниот санитарен и здравствен инспекторат (ДСЗИ) нешто помалку од 5 000 луѓе се во изолација на домашно лекување, кои доколку сакаат да гласаат на предвремените парламентарни избори на 15 јули треба да се пријават на веб-страницата на Државната изборна комисија (ДИК).
„Ние им дадовме списоци на здравствени работници. По тројца во општина ќе бидат определени од ДИК за да го спроведат заедно со одборите ова гласање. Нѐ известија од ДИК дека планираат симулација на процесот на денот на гласање во среда или четврток со членови на избирачки одбори, со претставници на набљудувачи од партиите, како би изгледало тоа со сите заштитни превентивни средства, согласно протоколот што го дадовме. Секако, претставници на Комисијата за заразни болести биле на таа симулација“,
рече Филипче.
Согласно ревидираниот роковник на ДИК, рокот за пријавување на лицата со ковид-19 и во самоизолација за гласање истекува на 8 јули на полноќ. Гласањето за оние што ќе се пријават ќе се одвива на 13 јули, а гласањето ќе го спроведат здравствени избирачки одбори, односно посебни избирачки одбори во кои членови се тројца здравствени работници и претставници на политичките партии.
Лицата што ќе добијат позитивен тест за ковид-19 и ќе им биде дадено решение за самоизолација од 8 до 13 јули нема да можат да се пријават и да гласаат на парламентарните избори.