Претседателот на Комисијата за селекција, пратеникот на ВМРО-ДПМНЕ, Александар Велјановски, кој и додели сто поени на адвокатката Емилија Алексовска, вели дека го сторил затоа што таа имала јасни одговори на интервјуто и е искусен правник. Членот на Комисијата, Ивана Петковска од невладината Коалиција „Сите за правично судење“, по своите едвај десет поени за Алексовска, коментира: „Остави многу сомнежи дека има политичко влијание“
Пратеничката на СДСМ, Јованка Тренчевска, цитираше објава од Алексовска на социјалните мрежи во која му се обраќа на премиерот: „Македонија со вас е повторно жива, повторно наша и повторно горда“, дополнувајќи го обраќањето со „знакчето за ’цела да е’“. Алексовска не можеше да се сети дека имала таква објава на Икс
Фото: Принтскрин
Исти одговори од кандидатката, а сосема различно бодување од членовите на комисијата. Кумановската адвокатка Емилија Алексовска освои најмногу поени на ранг-листата по спроведените интервјуа со кандидатите за избор на нов член на Судскиот совет на Република Северна Македонија. Со освоени 62,57 бода, таа има најголеми шанси да биде избрана од Собранието за оваа позиција, во телото што избира и разрешува судии.
Седницата за интервјуирање се одржа вчера во Собранието, а ја спроведе Комисијата за селекција, составена од пратеници, судија, адвокат и претставник од граѓанскиот сектор.
На интервјуто присуствуваа и поставуваа прашања и претставници на граѓанските организации од областа на правосудството и владеењето на правото.
Квалификации и визија
Според образложението на Комисијата за селекција, Емилија Алексовска има искуство во правната професија по положен правосуден испит, во работата од областа на правосудството и има визија за нејзината работа во Судскиот совет и за работата на Советот.
Наведено е и дека дала одговори на поставените општи и посебни прашања поврзани со етиката, интегритетот, владеењето на правото и решавањето на конфликтни и кризни ситуации.
Оценки од комисијата – од нула до максимум
Во поединечното бодување, Алексовска добила максимални бодови за нејзината визија и одговорите на посебните и општите прашања од претседателот на комисијата – пратеникот на ВМРО-ДПМНЕ, Александар Велјановски (100 бодови) и од судијката Сања Лазова Стојанова (95 бодови).
И членот Ваљбона Адили Емини, пратеничка од Влен, дала максимален број поени за искуството во правната професија и за визијата на Алексовска, а бодови има скратено за одговрите на општите и посебните прашања. Сепак, вкупните поени за Алексовска од овој член на комисијата се 90.
Останатите членови на Комисијата, адвокатката Флора Илковска и пратеничките на СДСМ и на ДУИ, Сања Лукаревска и Рина Ајдари, при бодувањето дале половина поени за сите области за кои е оценувана Алексовска.
Во записникот од седницата на Комисијата може да се види дека кај бодувањето, Алексовска има добиено најмалку поени од членот Ивана Петковска од Коалицијата „Сите за правично судење“. Петковска има дадено само 10 од можните 40 за искуството на кандидатот, а за визијата и одговорите на општите и посебните прашања дала нула поени.
Партиски или професионален шмек
Од записникот лесно може да се увиди различното оценување од пратениците кои доаѓаат од различни политички партии. Така, претседателот на Комисијата, Александар Велјановски (ВМРО-ДПМНЕ), ѝ додели максимални 100 бодови на Алексовска, додека Ваљбона Адили Емини (Влен) ја оцени со 90 бодови. Од друга страна, опозициските пратеници се поскромни во оценувањето – Сања Лукаревска (СДСМ) ја оцени со 50, додека Рина Ајдари (ДУИ) ѝ додели 43 бода.
Дали ваквиот очигледен расчекор во бодувањето меѓу пратениците од различни партии ја покажува политичката димензија и поделба во процесот на рангирање, ги прашавме пратениците и други членови на Комисијата за селекција.
Пратеникот Александар Велјановски (ВМРО-ДПМНЕ) вели дека максималниот број поени од него се должат на одговорите што ги дала кандидатката.
„Имав можност да го слушнам нејзиното излагање и мислам дека имаше јасни одговори. Таа е искусен правник и сметам дека ги задоволува критериумите“,
ни рече Велјановски.
Прашан дали за високото бодување на кандидатот има партиска позадина, Велјановски вели дека доколку било така, резултатите немало да бидат унифицирани туку ќе биле поразлични.
Половичното бодување од пратеничката Сања Лукаревска (СДСМ) таа вели дека се должи на недобивањето одговори за време на вчерашното интервју.
„Не бев задоволна, не добивме одговори, а знаеме и дека има статуси на социјални мрежи. Секогаш велат дека ќе се изземат од партиски притисоци, но сепак кандидатката не задоволува“,
ни рече Лукаревска.
Во рамките на интервјуто пред Комисијата за селекција, претставничката од граѓанскиот сектор Ивана Петковска, ја соочи кандидатката Емилија Алексовска со прашање поврзано со нејзиниот интегритет и активност на социјалните мрежи.
Петковска ја праша Алексовска:
„Како кандидат за член на Судскиот совет од Вас се очекува не само да бидете независни, туку и со Вашето однесување да ја зајакнувате довербата во независноста на судството. Па оттаму, имајќи ја предвид Вашата очигледно јавно видлива активност на социјалните мрежи со коментари на одредени политички партии и објави на премиерот, како би нè убедиле дека доколку бидете избрани, вашите одлуки за избор, унапредување и одговорност на судии би биле надвор од политички влијанија и притисоци?“
Во одговорот, Алексовска рече дека нејзиното постапување ќе се темели исклучиво на правото и објективните критериуми.
„Во моето постапување, доколку бидам избрана, ќе се раководам исклучиво врз основа на Уставот, законите и објективно утврдените, мерливи и еднакви критериуми за сите кандидати. Секој мој професионален став и одлука ќе бидат засновани на релевантни, проверливи факти и јасно образложени на транспарентен начин, со цел секој реален и разумно восприемлив набљудувач да може да ја провери нивната логика и законитост. Цврсто ќе ги отфрлам секакви лични, политички и други недозволени влијанија“,
одговори Алексовска.
Денеска ја прашавме и Ивана Петковска на што се должи ниското бодување на кандидатката од нејзина страна.
„Десетте бодови што ги дадов се однесуваат на искуството што го има кандидатката. Но, декларативните изјави, немањето одговори на конкретни прашања и визијата што ја претстави добија нула поени. Остави многу сомнежи дека има политичко влијание“,
рече Петковска.
На вчерашната седница и пратеничката Јованка Тренчевска се осврна на активноста на Алексовска на социјалните мрежи наведувајќи дека на Икс има коментари од нејзиниот профил на објавите на премиерот Христијан Мицкоски.
„Имате објава во која му се обраќате на премиерот и велите: Македонија со вас е повторно жива, повторно наша и повторно горда и со знакчето за ’цела да е’. Дали можеби ви е хакиран профилот“,
праша Тренчевска.
Алексовска на ова рече дека има профил на социјалната мрежа, но оти тој е некористен со години.
„Одговорно тврдам дека имам профил на Икс што го години не е активен. Не се сеќавам дека некогаш сум го ставила коментарот што го посочивте. Многу ретко коментирам на социјални мрежи и немам време за тоа“,
рече Алексовска.
Визијата на Алексовска: Функцијата во Судскиот совет е јавна одговорност
Во воведното обраќање, Алексовска рече дека функцијата член на Судскиот совет за неа не претставува само признание за досегашниот професионален пат, туку јавна одговорност.
„Мојата визија е Судскиот совет да биде институција која истовремено ја штити независноста и интегритетот, но и строго инсистира на професионалност и одговорност во судството. На огласот не ја нудам само мојата професионална биографија, туку ја нудам мојата лична независност, практично искуство, академско знаење и способност за професионално расудување кое се потпира на три перспективи – практичната, академската и институционалната“,
образложи таа.
Рече дека очекува сложени одлуки, критики и предизвици, но дека независноста се огледа токму во способноста кога е најтешко да се каже „не“.
„Мојот пристап ќе биде едноставен во начелата, а сериозен во примената: закон пред личен интерес, критериум пред лична наклонетост, образложение пред произволност и независност без привилегија“,
кажа Алексовска.
Што вели биографијата на Алексовска
Емилија Алексовска е адвокат со долгогодишно искуство и доцент по казнено процесно право на Правниот факултет при Универзитетот „Мајка Тереза“ во Скопје. Родена е во Крива Паланка.
Во биографијата што ја има доставено до Комисијата, Алексовска наведува дека е самостоен адвокат со седиште во Куманово уште од 2005 година, со повеќе од две децении континуирано искуство во казненото, граѓанското, управното, работното и трговското право. Покрај основниот правосуден испит, таа вели дека поседува и бројни специјализирани овластувања и сертификати, вклучувајќи овластување за застапување и одбрана на деца (правда за децата), лиценца за овластен регистрационен агент во Централниот регистар, како и овластување за давање секундарна бесплатна правна помош доделено од Министерството за правда.
На огласот беа пријавени тројца кандидати. Вториот кандидат на ранг-листата Џоко Диков освои 57,14 бодови, додека третиот кандидат Фадил Џелили не присуствуваше на закажаното интервју, со што се смета дека ја повлекол пријавата.
Собраниската Комисија за прашања на изборите и именувањата, врз основа на извештајот од Комисијата за селекција, со седум гласа „за“ и ниту еден против и воздржан на денешната седница ги утврди предлог-кандидатите – Емилија Алексовска, адвокат од Куманово и Џоко Диков, адвокат од Струмица за член на Судскиот совет. Конечната одлука треба да ја донесе парламентот на пленарна седница.