Никола Тодоров посочува три причини поради кои, според него, вчерашниот ден бил разочарувачки за членството на ВМРО-ДПМНЕ
Заев на еден брутален начин, политички, го тресна од земја Мицкоски, по стоти пат. Јасно е, сѐ додека Мицкоски е на чело на ВМРО, Заев ќе си игра мајтап со ВМРО и ќе биде на власт во државата. Мицкоски си оди, Заев си оди, напиша на Фејсбук поранешниот министер и функционер на ВМРО-ДПМНЕ, Никола Тодоров, коментирајќи за вчерашното изгласување доверба на Владата, на барање на премиерот Зоран Заев, а по тврдењата на опозицискиот лидер Христијан Мицкоски дека има ново мнозинство.
Тодоров посочува три причини поради кои, како што вели, вчерашниот ден бил разочарувачки:
Како прва причина, Тодоров го наведува тоа дека Владата опстана. Тој вели дека жали што опстоја Владата предводена од Заев и СДСМ.
Втората причина за разочараност, според Тодоров, е тоа што излегла на виделина лагата дека има ново парламентарно мнозинство, предводено од ВМРО. Кај сите членови, вели, се подгреваше лажна надеж од страна на Мицкоски дека Владата е готова, падната и дека за неколку дена ова ќе биде реалност.
Третата причина за разочараност, како што оценува, е што сопартијци очи си вадат по социјалните мрежи, со погрдни зборови и лоши мисли. Повторно причината за длабоката поделба, според Тодоров, е Мицкоски.
Даниела Рангелова, поранешна пратеничка и претседателка на Унијата на жени на ВМРО-ДПМНЕ, со уште покритичен тон синоќа го коментираше ненадејното барање на Заев да се гласа за доверба на Владата, по што Собранието ја потврди поддршката за неговиот кабинет.
„Дали може да му се верува на овој човек? Ни Владата падна, ни тој успеа да обезбеди ново мнозинство, за жал“,
напиша Рангелова на Фејсбук во статус над фотографија од Мицкоски на која е напишана и неговата изјава дека уценети луѓе мора да пеат онака како што им е кажано.
Од Иницијативниот одбор за вонреден конгрес на ВМРО-ДПМНЕ на 28 март го обвинуваат Мицкоски дека лажел оти има обезбедено парламентарно мнозинство и свесно ширел еуфорија, но вчера, како што велат, членовите на ВМРО-ДПМНЕ добиле „ладен туш“. Иницијативниот одбор бара Мицкоски веднаш да поднесе оставка.
Но Мицкоски и натаму тврди дека владата на Заев ќе падне наскоро. Според лидерот на ВМРО-ДПМНЕ, Заев ја искористил неговата изолација поради ковид-19, ама владата на СДСМ и ДУИ, сепак, е на „апарати за дишење“.