Дали се точни партиските информации кои се лиферуваат по медиумите дека Мицкоски обезбедил мнозинство и доколку се точни, зошто тогаш ѝ се остава еден ден повеќе на власта доколку тоа е на штета на Македонија, прашуваат од Иницијативниот одбор во ВМРО-ДПМНЕ кој бара вонреден конгрес и отчет на партискиот лидер.
Кога станува збор за новото мнозинство, тие го прашуваат Христијан Мицкоски и кој е неговиот став на изјавите на генералниот секретар на Алијанса за Албанците, Арбен Таравари, дека оваа партија нема да коалицира со некој кој не ги признава Преспанскиот и Договорот за добрососедство со Бугарија.
„Овие прашања заслужуваат одговор пред делегатите на конгресот. 17. вонреден Конгрес на ВМРО-ДПМНЕ ќе биде конгрес на обединување и нов почеток. 17. вонреден Конгрес на ВМРО-ДПМНЕ ќе биде конгрес на соочување со грешките и пропустите и нивно надминување. 17. вонреден Конгрес на ВМРО-ДПМНЕ ќе биде конгрес кој ќе донесе нова енергија и верба дека партијата знае и умее да победува“,
велат од Иницијативниот одбор за конгресот кој го закажаа за 28 март годинава.
Во денешното соопштение тие го обвинуваат Мицкоски и како најодговорен за тоа што партијата изгубила 150 000 гласови од парламентарните избори 2016 до изборите кои се одржаа лани во јули.
„Најодговорен за тоа е Христијан Мицкоски кој има обврска да објасни првин пред своите сопартијци сè што сработил овие три години и дали ефектот од тоа што го сработил ги задоволува неговите очекувања и претходно поставени цели“,
велат од Иницијативниот одбор повикувајќи го уште еднаш да се појави на конгресот и да соочи со делегатите кои го избрале.