Група еколошки активисти формираа Иницијатива за забрана на пластични кеси и бараат од надлежните без одлагање да донесат законска одредба за забрана на пластичните кеси за пазарење и да воведат нови, вистински биоразградливи, според европските стандарди, а истовремено, кај потрошувачите да се поттикне создавањето навика за користење на платнени торби за повеќекратна употреба.
„Забраната на дел од пластичните кеси е мерка за која сегашната Влада изрази намера да ја реализира. Забраната ќе се однесува на пластичните кеси што не се биоразградливи, додека во промет би продолжиле да се пуштаат биоразградливи пластични кеси при што нивната цена би се зголемила на 10 денари“,
велат од Иницијативата.
Укажуваат дека од надлежните било најавувано дека овие мерки, предвидени со новиот закон за управување со пакување и отпад од пакување, ќе стапат на сила на 1 јануари 2021 година.
„Јануари се ближи, а овие мерки не се спроведени. Не само што новиот закон не е усвоен, туку е уште една фаза поназад, односно не е ни испратен до Собранието на усвојување. Новиот состав на Собранието веќе е конституиран, новата Влада е избрана и веќе работи. И покрај неопходните итни мерки што треба да се преземат во однос на пандемијата со ковид-19, сметаме дека е неоправдано во недоглед да се одолговлекува забраната на пластичните кеси која беше најавена за 1 јануари 2021 година“,
наведуваат од Иницијатива за забрана на пластични кеси.
Оваа Иницијатива нагласува дека огромна количина пластични кеси завршуваат на депониите, каде се горат и го загадуваат воздухот, или се фрлаат по улиците, а често завршуваат и во водените текови.
„Се може без пластични кеси! Бараме од Владата под итно да го заврши она што го најави. Бараме во промет да се пуштаат единствено биоразградливи пластични кеси за пазарење, кои ќе ги исполнуваат еколошките стандарди“,
пишува во соопштението од Иницијативата за забрана на пластични кеси.
Оваа Иницијатива од синоќа активираше и Фејсбук страница на која во моментов освен двете насловни фотографии и описот за што се залага, не е објавено ништо друго.
„360 степени“ пред две години пишуваше за планови да се воведе забрана за пластични кеси од 2021 откако министерот за животна средина Насер Нуредини најави дека предложиле забрана за пластични шишиња, лажици, производи за еднократна употреба. Какво беше расположението во власта тогаш и кои беа плановите погледнете во сторијата во продолжение.