Од компанијата посочуваат дека во првата фаза на планот ќе се прави инспекција на мрежата по што ќе следува реконструкција за подобрување на снабдувањето и отстранување на дефектите што беа резултат на нелегалните приклучувања во Општина Арачиново. Целосната реализација на планот, како што посочуваат, ќе значи снабдување без прекини и речиси без дефекти за жителите на Општината
Од вчера екипите на Електродистрибуција излегоа на терен во Општина Арачиново и непречено започнаа со реализација на првата фаза на планот, информираат од „ЕВН Македонија“ откако неодамна жителите на оваа општина се пожалија оти со денови немаат струја и покрај тоа што, како што велат, редовно ги плаќаат сметките.
„Во оваа фаза се прави инспекција на мрежата по што ќе следува реконструкција за подобрување на снабдувањето и отстранување на дефектите кои беа резултат на нелегалните приклучувања“,
велат од ЕВН за МИА.
Од компанијата посочуваат дека реконструкцијата ќе трае со месеци, па дури и повеќе од една година.
„Целосната реализација на планот ќе значи снабдување без прекини и речиси без дефекти за жителите на Арачиново“,
потенцираат од „ЕВН Македонија“.
Минатата недела жителите од Општина Арачиново се пожалија дека со денови немаат струја во своите домови и покрај тоа што посочија дека редовно ги плаќаат сметките за електрична енергија. Според ЕВН, пак, прекинот на доток на струја во општината е поради дефект на трафостаниците,
Министерот за економија Крешник Бектеши во меѓувреме кажа дека е најдено привремено решение по однос на ова прашање, по што најави дека од оваа недела екипите на ЕВН ќе работат непречено во Општина Арачиново и на тој начин ќе почне да се наплаќа струјата во оваа Општина, но и на други места.
Бектеши посочи дека е точно оти има загуби на електрична енергија во Општина Арачиново, меѓутоа, како што нагласи, загуби има и во Куманово, Тетово, Гостивар, Кичево и Скопје. Поради тоа, како што најави, ќе побара од МВР и другите надлежни институции да постапат во сите општини каде што има големи загуби на струја, бидејќи според него, тие се на товар на сите потрошувачи на електрична енергија.
Откако жителите на општината реагираа дека со денови немаат струја, по ова прашање се произнесе и Народниот правобранител кој апелираше до ЕВН и до надлежните институции, пред сѐ до Министерството за внатрешни работи, веднаш да ги преземат сите мерки и да обезбедат предуслови за санирање на дефектот.