До канцеларијата на Народниот правобранител, како што информираат оттаму, е доставена претставка од група граѓани, жители на Општина Арачиново, кои наведуваат дека иако редовно си ги плаќаат сметките за потрошена електрична енергија, во услови на економска криза, трпат големи материјални штети
По неколку дена откако жителите на Општина Арачиново се жалат оти немаат електрична енергија, што според ЕВН е поради дефект на трафостаниците, народниот правобранител упати апел до компанијата и до надлежните институции, пред сѐ до Министерството за внатрешни работи, веднаш да ги преземат сите мерки и да обезбедат предуслови за санирање на дефектот.
До канцеларијата на Народниот правобранител, како што информираат оттаму, е доставена претставка од група граѓани, жители на Општина Арачиново, кои наведуваат дека иако редовно си ги плаќаат сметките за потрошена електрична енергија, во услови на економска криза, трпат големи материјални штети.
Велат дека им им се расипува храната складирана во фрижидерите, но и дека не се во состојба да одржуваат лична хигиена. Со одложување на санирањето на дефектот, се жалат дека се дискриминирани.
„Народниот правобранител во оваа пригода ги повикува на заедничка соработка и локалните власти, како и жителите на Општината, со цел што побрзо нормализирање на состојбата“,
стои во соопштението.
Како што објави Алсат, од ЕВН велат дека последниот дефект во Општина Арачиново се појавил во понеделникот наутро и оти е последица на континуираното незаконско користење струја од страна на жителите.
Оттаму посочуваат дека во Арачиново нивните тимови често се соочуваат со вербални и физички напади од жителите, што го оневозможува извршувањето на работата во целина, а дека сè додека нема нормални услови за работа и има пречки во извршувањето на работата нема да има можност за санирање на дефектот.
Во фејбук-статус од пред неколку дена, првиот човек на Општина Арачиново, Ридван Ибраими, напиша дека ЕВН има механизми да ги принуди граѓаните да ги плаќаат сметките, па смета дека проблемот има друга заднина.