Од опозициската ВМРО-ДПМНЕ, пак, повикувајќи се на изјавата на потпретседателката на ЕИБ, порачаа дека проектот поради кој Арсовска го разрешила нивниот кадар од „Водовод и канализација“, е кристално чист. Додаваат оти Арсовска сега се претставува како спасител на проектот кој самата го саботирала
Европската инвестициска банка (ЕИБ), која е еден од финансиерите на проектот за пречистителната станица во Скопје, не пронашла никакви пропусти во целокупната тендерска постапка за изведба на проектот.
Ова денеска го изјави потпретседателката на ЕИБ, Лилјана Павлова, која по потпишувањето на грантот од 70 милиони евра кажа дека процесот на јавната набавка за пречистителната станица бил успешно завршен.
„Во текот на постапката и јавните набавки за пречистителната станица беа успешно завршени, не беа пронајдени никакви пропусти и добија зелено светло за потпис од страна на изведувачот и договорениот супервизор од ‘Водовод и канализација’“,
изјави денеска потпретседателката на ЕИБ, Лилјана Павлова.
Скопската градоначалничка Данела Арсовска, пак, од друга страна, тврди дека евентуалните пропусти во процесот на јавна набавка за пречистителната станица биле спречени поради нејзиното навремено дејствување.
„Нема проблем затоа што не дозволивме да го има“,
рече Арсовска.
Пречистителната станица беше предмет на големи контроверзии откако во октомври минатата година Арсовска го разреши директорот на Јавното претпријатие „Водовод и канализација“, Златко Перински, кого го обвини за самоволие и несоодветно постапување во тендерската постапка за изведба на проектот.
По разрешувањето на Перински, инаку кадар на ВМРО-ДПМНЕ, следуваа разрешувања на директори и други функционери, смени во комисијата која треба да одлучи кој ќе ја гради пречистителната станица, а тоа беше и почеток на „расколот“ меѓу Арсовска и опозициската ВМРО-ДПМНЕ.
Од опозициската партија, пак, повикувајќи се на изјавата на потпретседателката на ЕИБ, порачаа дека проектот поради кој Арсовска го разрешила нивниот кадар од „Водовод и канализација“, е кристално чист.
„Овој проект беше директно саботиран од Данела Арсовска и СДС лажно манипулирајќи дека е криминален, и дека кадрите на ВМРО-ДПМНЕ се со рацете во медот. Арсовска се однесува како да има колективна амнезија на сеќавањето. И, сега, откако го одобри, ќе се прикажува како за спасител на проектот кој го саботираше“,
порачаа од ВМРО-ДПМНЕ.
Пречистителната станица за отпадни води за Скопје, која треба да се гради во Трубарево, Општина Гази Баба, треба да ги пречистува отпадните, фекални и канализациски води од речиси сите домаќинства во главниот град и такви да се испуштаат во реката Вардар.
По денешното заокружување на финансиската рамка, останува уште да се завршат процесот на експропријација и урбанистичко-планската документација со Градот Скопје и Општина Гази Баба, како и да се потпишат договорите за градба и надзор од страна на ЈП „Водовод и канализација“.