Сите, вклучувајќи ги и денешните обвинети што признаа вина, со првостепената пресуда добија и забрана за извршување професија и дејност во времетраење од 10 години
Две години и 5 месеци затвор доби обвинетата Оливера Софрониевска, која е седма по ред што призна вина во случајот „Двојник“, кој се однесува на нелегалното издавање македонски пасоши на странци осомничени за криминал и барани со потерници.
Според обвинението, таа одобрила издавање на 198 пасоши.
Судијката Оља Ристова, рече дека казната ја одмерила според отежнителните околности, како што е нејзината положба како овластено службено лице, но и олеснителните околности, како тоа што досега не е осудувана и нејзината семејна положба.
Странките имаат право на жалба за оваа пресуда до Апелацискиот суд во Скопје.
Пред оваа обвинета денеска вина призна уште еден обвинет, кој доби 1 година и 7 месеци затвор.
На минатото рочиште во средата тоа го направија петмина обвинети, од кои четворица добија затворски казни од 2 години до 2 години и 7 месеци, а еден доби условна казна.
Сите, вклучувајќи ги и денешните обвинети што признаа вина, со првостепената пресуда добија и забрана за извршување на професија и дејност во времетраење од 10 години.
Една обвинета, која не дојде во судот поради здравствени причини, исто така преку својот адвокат најави признавање вина. За неа се раздвои предметот и ќе се одржи рочиште откако ќе ѝ се подобри здравствената состојба.
ОБНОВЕНО:
По изрекувањето на оваа пресуда, на обвинителна клупа во предметот „Двојник“ останаа 3 вработени во МВР. За нив судскиот процес ќе продолжи на 11 мај.
Обвинителниот предлог за овој случај беше поднесен на 14 април. Обвинетите од МВР се товарат за злоупотреба на службената положба и овластувања, а посредникот за поттикнување.
Како што тогаш соопштија од ОЈО Скопје, пасошите се издавале во периодот од јуни 2017 до крајот на 2020 година. Им биле издадени пасоши на 214 странски државјани и на еден македонски државјанин, за кој претходно министерот Оливер Спасовски посочи дека станува збор за избеганиот ексначалник на Петтата управа во УБК, Горан Грујевски.
Обвинетите издавале пасоши бидејќи, според Обвинителството, имале материјална корист која, според последната изјава на обвинителката Спасенка Андонова, се уште не утврдена.
„Ако добро го прочитавте кривичното дело коешто им се става на товар, во описот на делото стои некаква материјална корист прибавена од нивна страна. Тоа значи дека во конкретниот случај не располагаме со точни податоци за парични средства и за висина на парични средства коишто се прибавени од нивна страна и затоа е таа квалификација којашто е употребена. Меѓутоа, судот со донесувањето на одлуката и со изрекувањето на казните воедно се определува и за една друга казна, а тоа е забрана за вршење професија и дејност, така што верувам дека оваа казна веќе многу повеќе ќе ги погоди одошто нешто друго во поглед на материјалната корист“,
изјави денеска обвинителката.
За пасошите тие, според ОЈО Скопје, користеле идентитети на македонски државјани кои досега не ваделе македонски пасоши, а се иселени од земјава или од раѓање живеат во странство и никогаш не оствариле влез во Македонија.
Со податоците од овие македонски државјани и фотографија од странците што ги добивале пасошите, обвинетите ги изработувале преку системот на МВР. Странците што ги добивале патните исправи се лица што се бараат со меѓународни потерници, но благодарение на македонските пасоши со туѓ идентитет тие можеле слободно да се движат.
„Тие баратели имале намера да ги употребат нелегалните македонски пасоши при премин на државни граници, легитимирајќи се со македонската патна исправа и прикривајќи го својот вистински идентитет“,
рекоа од ОЈО Скопје на 14 април.
Кога беше поднесен обвинителниот предлог, од ОЈО Скопје немаа информации каде и колку често бараните криминалци ги користеле македонските пасоши, но го задолжиле МВР преку своите инструменти во државата и во странство да провери и сето тоа да го документира со писмени докази.