Се редат признанија на вина во „Двојник“: Уште една обвинета призна – седма по ред

Обвинителката Спасенка Андонова претходно изјави дека не е изненадена од признанијата и рече дека со оглед на многубројните цврсти докази очекува овој предмет да заврши брзо, како и дека очекува и нови признанија

Ново, седмо по ред признание на вина, се случи во судкиот процес „Двојник“. Оливера Софрониевска, вработена во МВР, во продолжението на денешното судско рочиште призна вина за злоупотреба на службената положба и овластувања. За неа пресуда ќе се изрече во текот на денот.

Пред неа денеска призна вина уште еден обвинет, кој доби затворска казна од 1 година и 7 месеци.

Пресуда за пасошите во „Двојник“: Една условна и четири затворски казни за обвинетите што признаа вина

На минатото рочиште во средата тоа го направија и други петмина обвинети, кои добија затворски казни од 2 години до 2 години и 7 месеци. Меѓу нив беше и посредникот Раиф Мифтари.

Пресуда за пасошите во „Двојник“: Една условна и четири затворски казни за обвинетите што признаа вина

Во предметот уште една вработена во МВР, која од здравствени причини не дојде на минатото рочиште, најави дека ќе признае во вина.

Со ова, во „Двојник“ на обвинителна клупа ќе останат само тројца обвинети од вкупно 11.

Обвинителката Спасенка Андонова претходно изјави дека не е изненадена од признанијата и рече дека со оглед на многубројните цврсти докази очекува овој предмет да заврши брзо.

„Верувам дека соочени со доказите коишто се прибрани во текот на периодот којшто претходеше на поднесувањето на обвинението мислам дека можеби во очекување ќе бидеме и на следно признание на вината“,

рече обвинителката.

Таа изјави и дека во моментов не располагаат со информации колку пари заработиле обвинетите од нелегалното издавање пасоши на странци осомничени за криминал и барани со потерници.

„Ако добро го прочитавте кривичното дело коешто им се става на товар, во описот на делото стои некаква материјална корист прибавена од нивна страна. Тоа значи дека во конкретниот случај не располагаме со точни податоци за парични средства и за висина на парични средства коишто се прибавени од нивна страна и затоа е таа квалификација којашто е употребена. Меѓутоа, судот со донесувањето на одлуката и со изрекувањето на казните воедно се определува и за една друга казна, а тоа е забрана за вршење професија и дејност, така што верувам дека оваа казна веќе многу повеќе ќе ги погоди одошто нешто друго во поглед на материјалната корист“,

изјави обвинителката.