Во Русија досега се уапсени над 6,4 илјади демонстранти против агресијата над Украина
Движењето на рускиот опозициски лидер Алексеј Навални, кој отслужува затворска казна во Русија, ги повика Русите на кампања за граѓанска непослушност во знак на протест против инвазијата на Украина.
„Путин ѝ објави војна на Украина и се обидува да ги натера сите да мислат дека Украина е нападната од Русија, односно од сите нас. Но, тоа не е така. Мораме да покажеме дека не ја поддржуваме војната. Ги повикуваме Русите на граѓанска непослушност. Не молчете“,
напишаа соработниците на Навални на Твитер.
Најмалку 413 лица беа уапсени за време на вчерашниот протест против војната во Украина, информира организацијата за граѓански права ОВД-инфо, со што вкупниот број уапсени од почетокот на демонстрациите во четвртокот достигна 6 440.
Приближно половина од уапсените, 3 126, се приведени за време на протестите во Москва, додека 2 084 апсења биле регистрирани во Санкт Петербург, соопшти синоќа ОВД-инфо.