На три недели пред изборите (26 септември), анкетата на „Дојчландренд“, која редовно ја објавува јавниот сервис АРД, покажува дека СПД може да смета на 25 проценти од гласовите. Тоа е дури седум проценти повеќе од минатиот месец
Со наближувањето на изборите за Бундестагот, се поизвесно е дека социјалдемократите ќе бидат победници. Иако тоа беше незамисливо до неодамна, анкетата на „Дојчландтренд“ покажува дека тоа е заслуга на нивниот кандидат за канцелар – Олаф Шолц.
Не сметајќи го растот на поддршката во некои анкети во 2017 година, германските социјалдемократи станаа најпопуларната партија во Германија практично за првпат во ерата на демохристијанската канцеларка Ангела Меркел, пишува Дојче веле.
На три недели пред изборите (26 септември), анкетата на „Дојчландтренд“, која редовно ја објавува јавниот сервис АРД, покажува дека СПД може да смета на 25 проценти од гласовите. Тоа е дури седум проценти повеќе од минатиот месец.
Во исто време, продолжува серијата лоши резултати за демохристијаните, чиј пад е забележан и во други истражувања на јавното мислење. „Дојчландренд“ им дава само 20 проценти од гласовите, што би бил убедливо најлош резултат во историјата.
Следуваат Зелените со 16%, што е нивниот најслаб скор во последните три години. Либералите (13 проценти) продолжуваат да растат и избија на четвртото место, пред Алтернатива за Германија (12 проценти). Левицата, исто така, може да смета на влез во Бундестагот со шест проценти.
Причината е Шолц
Математиката е едноставна: Ако се знае дека никој не сака коалиција со десничарската Алтернатива, тогаш за првпат во повоената историја на Германија ќе и треба влада составена од три разновидни политички опции.
Доколку СПД победи на изборите, ќе има приоритет да се обиде да направи коалиција со Зелените и Либералите, или Зелените и Левицата. Можни се и комбинации со Демохристијаните и Зелените, или Демохристијаните и Левицата.
Демохристијаните, од друга страна, дури и да загубат, би можеле да одат во коалиција со Зелените и Либералите, и на тој начин сепак да го зачуваат местото канцелар.
Но, ако се погледнатсамите кандидати за канцелар, се гледа дека тоа на гласачите не би им се допаднало. Бидејќи засега најпопуларен е кандидатот на СПД Олаф Шолц, кој во моментов е вицеканцелар. Доколку канцеларот би бил избран директно, 43 проценти од граѓаните би гласале за него, што е за два проценти повеќе отколку во август.
Само 16 проценти би гласале за Армин Лашет, кандидатот на Демохристијаните и премиер на провинцијата Северна Рајна-Вестфалија, додека кандидатката на Зелените, Аналена Бербок, ќе добие 12 проценти.
Лашет можеби е најзагрижен што само малцинство поддржувачи на неговата партија сакаат тој да биде канцелар (47 проценти). Од друга страна, 87 проценти од гласачите се меѓу поддржувачите на социјалдемократот Шолц.
Гласачите му припишуваат сигурност, лидерство и компетентност на Шолц. Повеќе од една четвртина од поддржувачите на СПД изјавуваат дека ќе гласаат за оваа партија токму поради кандидатите, што е поголем процент отколку кај другите партии што граѓаните ги избираат поради нивната политичка програма.
Секој на свој терен
За граѓаните, четирите најголеми проблеми во Германија се: заштитата на животната средина и климатските промени (33 проценти), имиграцијата (22 проценти), корона-кризата (18 проценти) и социјалната нееднаквост (16 проценти).
Партиите во голема мерка ги задржаа своите области каде што граѓаните ги сметаат за најкомпетентни. Така, СПД води во областа на борбата за соодветни плати (43 проценти од граѓаните ги гледаат како најкомпетентни), пензиското осигурување (32 проценти), семејната политика и социјалната грижа (31 проценти).
Демохристијаните се први во областа на економската политика (34 проценти) и надминување на кризата предизвикана од пандемијата (27 проценти). Зелените добиваат 43 проценти од гласовите како најкомпетентни во климатската политика и тие се убедливо први, иако загубија дури 15 процентни поени од август.
Во деновите по фијаското во Авганистан, кога станува збор за надворешно-политички прашања, приближно една четвртина од граѓаните им даваат предност на СПД, односно на демохристијаните. Меѓутоа, дури 23 проценти не веруваат на ниту една партија во областа на надворешната политика – тој процент е двојно зголемен во споредба со минатите избори.