Опозициската партија упати и апел до професионалците во МВР и Јавното обвинителство да не дозволат, како што велат од ДУИ, да бидат дел од оваа трговија со влијание и на тој начин да не ја легитимираат оваа политичка зделка
Најголема карикатура на заробената држава – ваква квалификација даде опозициската Демократска унија за интеграција (ДУИ) на вчерашната прес-конференција на министерот за внатрешни работи Панче Тошковски и државниот јавен обвинител Љупчо Коцевски, на која беа изнесени детали за проширената истрага за случајот со пожарот во т.н. кабаре „Пулс“ во Кочани.
ДУИ обвини дека истрагата за трагедијата е селективна, еднострана и таргетирана кон албанскиот народ.
„Наместо вистинска правда за трагедијата во Кочани, пред јавноста се демонстрира трговија со влијание – еден вид трансакциска заштита меѓу главниот виновник, министерот Тошковски, и обвинител кој се наоѓа под политички притисок, со функција што зависи од волјата на премиерот. Вистинската правда не смее да се крие зад селективни истраги и медиумски перформанси. Јавноста со право бара одговорноста за ужасната трагедија во Кочани да се утврди точно и правично. Она што ни се прикажува не е правда – туку институционален агресивен напад, еднострано насочен кон албанскиот народ во оваа држава“,
наведуваат од ДУИ.
Опозициската партија упати и апел до професионалците во МВР и Јавното обвинителство да не дозволат, како што велат од ДУИ, да бидат дел од оваа трговија со влијание и на тој начин да не ја легитимираат оваа политичка зделка.
Во рамки на истрагата во саботата беа приведени поранешните министри за економија Ваљон Сарачини и Беким Незири, кадри на ДУИ, како и актуелниот министер без ресор и ексдиректор на Дирекцијата за заштита и спасување (ДЗС), Шабан Салиу. Меѓу уапсените е и актуелниот директор на ДЗС, Џеват Селами, кадар на ВЛЕН.