Мицкоски вчера побара средба со премиерот Димитар Ковачевски на која би се разговарало за датум за предвремени избори. Меѓутоа, оваа опција вчера ја отфрлија и од СДСМ, а Ковачевски му порача на Мицкоски дека не прифаќа уцени, а уште помалку реагира на неговите закани
Коалицискиот партнер во Владата – ДУИ поддржува предвремени парламентарни избори, но не годинава туку во април 2024 година, со цел тие да се одржат заедно со редовните претседателски избори.
Ова денеска на владиниот форум по повод 100 дена од новата влада го кажа првиот вицепремиер од редовите на интегративците, Артан Груби.
„ДУИ како дел од оваа коалиција го поддржува силно парламентарното мнозинство и владината коалиција и овде сме да ги реализираме овие проекти. На граѓаните не им требаат авантури, им треба одговорна, социјална влада, која ги слуша граѓаните и ги реализира нивните барања“,
рече Груби.
Последните парламентарни избори се одржаа на 15 јули 2020 година и ваквиот став на ДУИ практично значи дека тие поддржуваат парламентарни избори да се одржат само неколку месеци пред редовниот термин.
И најголемата партија во владината коалиција – СДСМ вчера ја отфрли можноста од предвремени парламентарни избори откако лидерот на опозициската ВМРО-ДПМНЕ, Христијан Мицкоски, на прес-конференција побара средба со премиерот Димитар Ковачевски на која би се разговарало за датум за предвремени избори давајќи му рок до 10 мај да одговори за средбата.
Ковачевски, пак, вчера експресно одговори дека не прифаќа уцени, а уште помалку закани од Мицкоски.
„Ниту се потребни средби за избори, ниту се потребни избори туку одговорно дејствување на сите политички партии. Потребно е функционално Собрание за носење закони и рационално трошење на буџетот во овие кризни времиња“,
рече Ковачевски кој за најавите од Мицкоски за радикализација, ја обвини опозицијата дека деструктивноста е нејзина одлика.