Како што не прифаќам уцени, уште помалку реагирам на закани. Деструктивноста е одлика и заштитен знак на Мицкоски и неговата партија, но тоа граѓаните го гледаат и препознаваат и таквите најави верувам дека силно ги осудуваат, вели премиерот Ковачевски
Уцени не прифаќам, а уште помалку реагирам на закани, му порача премиерот и лидер на СДСМ, Димитар Ковачевски на претседателот на ВМРО-ДПМНЕ, Христијан Мицкоски, кој денеска побара средба на која би се договориле за датум за предвремени парламентарни избори.
Избори, според премиерот, не се потребни бидејќи сега е потребна одговорна работа за менаџирање на кризата.
„Јас кажав повеќе пати и пак ќе кажам, уцени не прифаќам. Ова е втор пат како Мицкоски се обидува да ме уценува, а добро знаеме како заврши првиот пат. Неговите себични политички амбиции мене не ме засегаат, туку интересот на граѓаните и државата. Како Влада имаме многу одговорна работа, а тоа е менаџирање на најголемата економска криза по Втората светска војна. Ниту се потребни средби за избори, ниту се потребни избори туку одговорно делување на сите политички партии. Потребно е функционално Собрание за носење закони и рационално трошење на буџетот во овие кризни времиња“,
вели Ковачевски.
Меѓутоа, вели премиерот, тоа Мицкоски не го интересира туку тој е заинтересиран само за неговата политичка кариера.
На рокот за одговор до 10 мај што го даде лидерот на ВМРО-ДПМНЕ, Ковачевски уште еднаш порачува дека не реагира на неговите закани за радикализација.
„Што се однесува до заканите за некаква радикализација, му порачувам уште еднаш дека како што не прифаќам уцени, уште помалку реагирам на закани. Деструктивноста е одлика и заштитен знак на Мицкоски и неговата партија, но тоа граѓаните го гледаат и препознаваат и таквите најави верувам дека силно ги осудуваат. Владата е стабилна и одговорно владее, а најавите на Мицкоски се одраз на немоќ и безидејност за конструктивност. Ако сакаше што било конструктивно да направи досега ВМРО-ДПМНЕ, имаше можност да го направи. Наспроти тоа, тие произведуваат лажни вести, дигаат хистерија и партиски мобилизираат протести. ВМРО-ДПМНЕ прави сè друго освен реална и конструктивна политичка работа“,
вели Ковачевски.