Невропсихијатарката Викторија Вујовиќ зад затворени врати во судница во Основниот кривичен суд во Скопје ја објаснуваше здравствената состојба на ексградоначалник на Општина Гази Баба, Тони Трајковски.
Судот ја исклучи јавноста бидејќи станува збор за зачувување на приватноста на пациентот.
Боледувањето и извештаите за неговата состојба се издадени од оваа лекарка, врз основа на кои се одложи минатото рочиште за предметот ТНТ каде што е обвинет Трајковски.
Излагањето на Вујовиќ траеше кратко, а судијата Огнен Ставрев потоа на новинарите им рече дека ексградоначалникот ќе биде на боледување десетина дена и судењето ќе продолжи на 6 февруари.
Адвокатот на Трајковски, Јовица Страшевски, минатата недела рече дека здравствената состојба на неговиот клиент е резултат на претепувањето што се случи пред Нова година.
На 6 февруари јавноста треба да слушне и дали одбраната во ТНТ ќе се согласи да не се изведуваат доказите поединечно и да не се викаат сите сведоци одново, туку само формално да се прочитаат материјалните и вербалните докази.
Ова доаѓа откако предметот се врати на почеток бидејќи една од поротничките си даде неотповиклива оставка.
Адвокатот Страшевски пред медиумите веќе го изнесе својот став дека бидејќи е нов бранител во предметот за него е подобро да се изведат сите докази повторно, но како што рече, ако другите адвокати се согласат тоа да биде само формално, тој нема да прави опструкции.
Покрај Трајковски, обвинети се бившиот премиер Никола Груевски кому му се суди во отсуство, поранешниот министер Миле Јанакиески и уште четворица други кои во 2011 учествувале во процесот на уривање на комплексот „Космос“.
*Поврзани вести
Нема раздвојување на судењето за Тони Трајковски во ТНТ
Цаноски за обвинетите во ТНТ: Се надеваат дека ќе победат на избори и ќе се спасат од криминалите