Носителот на кандидатската листа во првата изборна единица на коалицијата „Можеме” предводена од СДСМ, Никола Димитров, вечерва го одржа првото видео-интервју на Фејсбук, во рамки на новиот концепт за водење на изборната кампања што го наметна коронавирусот.
Коментирајќи ги последните владини мерки и можноста за одложување на парламентарните избори, Димитров порача дека состојбата ќе ја следи владиниот кризен штаб и дека нема да се дозволи политичките интереси да се стават пред јавното здравје.
„Здравјето на граѓаните се разбира дека мора да е прв приоритет за сите и тоа е сигурно од наша страна. Сите калкулации со тоа се недозволени, без разлика дали нам ни одговара заради рејтингот и контекстот, изборите да бидат како што е планирано на 12 април, мислам дека ситуацијата е непредвидлива и секојдневно се менува и не смее да има калкулации со здравјето на граѓаните, па дури и тоа да е на некаква политичка штета“,
изјави Димитров.
Тој апелираше граѓаните доколку немаат неодложни обврски да не патуваат надвор од земјава, а за македонските државјани кои се во странство порача да не се враќаат дома освен во итни случаи.
Коментирајќи ги опозициските ветувања и концептот „Обнова“, со кој во првата изборна единица како носител на листата на ВМРО-ДПМНЕ ќе настапи Гордана Силјановска Давкова, Димитров порача дека тоа нема допир со реалноста.
„Нејзиното мото кога беше претседателски кандидат беше ‘Правда за Македонија’, но се чини тоа значеше правда за партијата односно неказнивност за партијата, а тоа го покажаа и со противењето на носењето за законот за ЈО“,
изјави Димитров.
Откако државата ќе стане членка на НАТО, Димитров најави дека фокус на новата влада ќе бидат внатрешните политики, меѓу кои справување со аерозагадувањето.