Се очекува денеска да биде утврдена потребата за донесување по скратена постапка на измените на двата закона, кои произлегоа од средбата Зоран Заев-Христијан Мицкоски
Претседателот на Собранието Талат Џафери за денеска во 13 часот закажа седница на чиј дневен ред се предлог-законите за одложување на пописот и за измени во Изборниот законик, двата по скратена постапка.
Со измените на Законот за попис, оваа статистичка операција се одложува за септември, додека една од корекциите на Изборниот законик предвидува одложување на локалните избори за втората половина на октомври, за да може да се спроведе пописот пред да почне кампањата.
Вчера на оваа тема се водеа неколкучасовни разговори во парламентот помеѓу пратеничките групи со цел да се постигне договор со коалицијата на Алијанса за Албанците и Алтернатива, но неуспешно. Според наши информации, на денешната одлука на Џафери за закажување седница не ѝ претходела нова координација, така што неизвесно е дали ќе има амандмани и за двата закона. Во секој случај, се очекува денеска да биде утврдена потребата за донесување по скратена постапка на измените на двата закона, што произлегоа од средбата Зоран Заев-Христијан Мицкоски.
Сепак, постапката за измените на Законот за попис е поедноставена, затоа што се носат и со европско знаменце, така што расправата во Комисијата за европски прашања не би траела подолго од два дена.
Официјално пописот почна денеска, но попишувачите не излегоа на терен за да го попишуваат резидентното население. Претпладне се огласи Државниот завод за статистика (ДЗС) со соопштение во кое од една страна се посочува дека нема да почнат теренските активности за пописот до завршувањето на постапката во Собранието, а од друга страна се наведува дека, со оглед на тоа што првично е предвидено операцијата да трае до 21 април, има време да завршат сите пописни активности.
Во однос на измените во Изборниот законик, како што претходно беше договорено на средбата помеѓу Зоран Заев и Христијан Мицкоски, измените кои првично треба да се направат се во однос на набавката и користењето на опрема за земање отпечатоци од прсти, која ќе се користи за идентификација на гласачите на денот на гласање.
Во Изборниот законик во наредниот период треба да има и други измени, според очекувањата, за вметнување на препораките од ОБСЕ/ОДИХР, а доколку се постигне политички договор ќе се прават измени и во однос на отворени листи за советници на локалните избори, еден круг на градоначалнички избори, како и за изборниот модел за парламентарни избори.