Во соопштение на ДЗС, од една страна се посочува дека нема да почнат теренските активности до завршувањето на постапката во Собранието, а од друга страна се наведува дека, со оглед на тоа што првично е предвидено операцијата да трае до 21 април, има време да завршат сите пописни активности
Државниот завод за статистика се јави претпладнево со соопштение за пописот кој треба(ше) да почне денеска, ама е одложен со политичка одлука за која нема се уште формална потврда од законодавниот дом.
Во соопштението на ДЗС, од една страна се посочува дека нема да почнат теренските активности за пописот до завршувањето на постапката во Собранието, а од друга страна се наведува дека, со оглед на тоа што првично е предвидено операцијата да трае до 21 април, има време да завршат сите пописни активности.
„Со оглед на новонастанатата ситуација во врска со Пописот 2021, а во согласност со Законот за попис на населението, домаќинствата и становите во Северна Македонија, до завршувањето на постапката во Собранието, што се очекува многу брзо, Државниот завод за статистика нема да ги отпочне пописните активности на терен. Со оглед на тоа дека е предвидено пописот да трае 21 ден, односно до 21 април, Државниот завод за статистика смета дека има доволно време сите предвидени пописни активности да се завршат на време“,
се наведува во соопштението.
Од ДЗС понатаму наведуваат дека, во периодот додека се чека разрешница во Собранието, Заводот уште еднаш ќе направи проверка на сите организациско-технички активности на терен за да биде уште повеќе
сигурен дека сè е подготвено за евентуално започнување со теренското попишување.
Во Собранието денеска се очекува нова координација меѓу пратеничките групи, со цел да се најде заедничко решение за почнување на процедурата за измена на Законот за попис, по предлог на Владата и по скратена постапка. Измените на Законот за попис се, исто така, со европско знаменце, што предвидува кратење на роковите за амандманска расправа.