Новите пратеници очекуваат до понеделник да ги добијат уверенијата, по што би било одлучено кога ќе се одржи првата седница на 10. собраниски состав и дали таа би завршила со избор на прв парламентарец, со оглед на неизвесноста околу тоа кои партии би биле дел од новото парламентарно мнозинство
Во Собранието велат дека сѐ уште не е утврден терминот на конститутивната седница. Новите пратеници очекуваат в понеделник да ги добијат уверенијата, по што би било одлучено кога ќе се одржи првата седница на 10. собраниски состав и дали таа би завршила со избор на прв парламентарец, со оглед на неизвесноста околу тоа кои партии би биле дел од новото парламентарно мнозинство.
Говорот што ќе го одржи на Мечкин Камен за Илинден веројатно ќе биде последната обврска на Талат Џафери како претседател на деветтиот собраниски состав, кој „ситно брои“ до конституирањето на новото Собрание, избрано на 15 јули.
Три години по изборот на Џафери за прв парламентарец (на 27 април 2017 година) и неговото тогаш премиерно обраќање на Илинден во Крушево, овој 2 Август тој повторно ќе се обрати на централната манифестација по повод 117-годишнината од Илинденското востание, овој пат како претседател на Собранието во заминување.
Соговорници од парламентот не исклучуваат можност Џафери да биде избран повторно на чело на законодавниот дом, посочувајќи дека тоа, сепак, зависи од тоа како ќе се развиваат преговорите меѓу партиите за формирање на новите парламентарно мнозинство и влада, а особено ако се имаат предвид „претензиите“ на ДУИ овој пат да ја добие премиерската функција.
Во секој случај, Џафери, како досегашен претседател на парламентот, треба да ја свика конститутивната седница на новиот собраниски состав, а може и да претседава со неа, со оглед на тоа што повторно е избран за пратеник. Потоа би почнале да течат и процедурите за формирање на идната влада, согласно уставно предвидените рокови.
Џафери треба да ја закаже конститутивната седница на новиот парламент до 4 август, а со оглед на најавата дека тој ќе учествува како прв човек на Собранието во одбележувањето на Илинден, проценките се дека седницата би почнала по празникот.
Во Собранието велат дека сѐ уште не е утврден терминот на конститутивната седница. Новите пратеници очекуваат до понеделник да ги добијат уверенијата, по што би било одлучено кога ќе се одржи првата седница на 10. собраниски состав и дали таа би завршила со избор на прв парламентарец, со оглед на неизвесноста околу тоа кои партии би биле дел од новото парламентарно мнозинство.
По изборите во 2016 година, конститутивната седница почна на 30 декември, кога беа верификувани мандатите на избраните пратеници, но не беше избран претседател на законодавниот дом. Следуваше празен од од четири месеци, по што Џафери беше избран на функцијата на 27 април 2017 година.
Иако датумот за првото заседание на новото Собрание сѐ уште не е утврден, во зградата на парламентот паралелно со изборите се правеа подготовки за дочек на новите пратеници, согласно здравствените протоколи за заштита од ковид-19. Веднаш по одредувањето на 15 јули како нов датум за изборите 2020 година, Џафери најави за „360 степени“ дека, со цел да се овозможат услови за одржување физичка дистанца меѓу пратениците, новиот парламент ќе почне да заседава во друга попространа сала и дека ќе се гласа со кревање рака, а и комисиите исто така ќе работата само во поголемите сали.
Во одбележувањето на Илинден, годинава ќе се вклучи и техничкиот премиер Оливер Спасовски, кому сега му е редот да биде на прославата во Скопје, додека шефот на државата Стево Пендаровски ќе оди во Пелинце.
Во врска со организацијата и прославата на државните празници, Владата го задолжи Министерство за здравство, преку Комисијата за заразни болести, да обезбеди протокол за организација на државните настани во време на пандемија.
За Илинден нема да се организира масовна прослава, а одбележувањето ќе биде според утврдени здравствени протоколи, со носење заштитни маски и држење физичко растојание.
Крушевскиот градоначалник Томе Христоски, кој е и претседател на манифестацијата „Десет дена Крушевска Република“, вели дека големиот Илинден и 117-годишнината од Илинденското востание ќе се прослават достоинствено, но очигледно ќе изостанат собирањата.