Според крушевскиот градоначалник, кој е и претседател на манифестацијата „10 дена Крушевска Република“, 117-годишнината од Илинденското востание ќе се прослави достоинствено, но веројатно ќе изостанат собирањата, а програмата ќе биде скратена
Крушево и крушевчани ќе ја чекаат Комисијата за заразни болести да каже како ќе се прославува Илинден и како ќе се одвива манифестацијата „10 дена Крушевска Република“, во услови на епидемија на коронавирусот во земјава.
Според крушевскиот градоначалник Томе Христоски, кој е и претседател на манифестацијата „10 дена Крушевска Република“, големиот Илинден и 117-годишнината од Илинденското востание ќе се прослават достоинствено, но очигледно ќе изостанат собирањата. Само се знае дека програмата на манифестацијата ќе биде скратена, но за сѐ друго треба да даде препораки Комисијата.
„Владата ја задолжи Комисијата за заразни болести утре и задутре да изготви препораки и решение за прославите за Илинден во Пелинце, Скопје и во Крушево. Факт е дека нема да има големи собирања, но Комисијата ќе го каже своето. Манифестацијата „10 дена крушевска република“ ќе биде со скратена програма. Најбитно ни е да се задржи достоинството за одбележувањето на големиот Илинден, на потсетувањето на големината на Илинденското востание, но за се друго ќе ги чекаме препораките. Од тоа зависат и прославата и програмата на Манифестацијата,
изјави Христоски, како пто пренесува МИА.
Инаку, Манифестацијата традиционално почнува на 1 август. Крушево ги пречекува коњаниците, на Гумење се подигнува знамето на Републиката со пригодна програма. Во 10-те дена вообичаени се бројните културни настани во чест на значењето на Илинденското востание. Централната прослава е на 2 август, на Илинден, на Мечкин Камен.
Минатата година, на прославата на Мечкин Камен се обрати тогашниот премиер Зоран Заев. Претходната 2018 година, на Мечкин Камен беше претседателот на парламентот Талат Џафери, така што годинава таму би требало да се обрати претседателотСтево Пендаровски.
Техничкиот премиер Оливер Спасовски и претседателот ан парламентот во заминување Џафери, пак, би требало да присуствуваат на одбележувањето на Илинден во Пелинце и во Скопје, со оглед на тоа што до 2 Август не се очекува да биде конституиран новиот собраниски состав и да биде избран нов претседател на Собранието.