Според исказот на семејството, причина за врзувањето било затоа што детето било агресивно, велат од Обвинителството
Основното јавно обвинителство (ОЈО) – Гостивар врши увид на местото на пожарот во зграда во Гостивар во кој живот го загуби седумгодишно дете. Првичните сознанија што ги објави Обвинителството се дека тоа било врзано со синџир на нозете.
„Првичните сознанија на лекарскиот тим на самото место упатуваат на тоа дека детето за време на пожарот било врзано со синџир на нозете. Според исказот на семејството, причина за врзувањето било затоа што детето било агресивно. Обвинителството ги презема сите дејствија за утврдување на евентуална кривична одговорност“,
велат од ОЈО Гостивар.
Увидот е во тек, а од Обвинителството велат дека очекуваат пристигнување на специјална екипа од Одделот за криминалистичко-технички испитувања и вештачења при МВР за да се испитаат причините за пожарот од кој се задуши детето.
Издадена е и наредба за обдукција на телото и се разговара со очевидците на настанот.
„По наредба на јавниот обвинител, се врши прибирање на трагите од самото место, кои треба да помогнат за прецизно утврдување на причините за настанатиот пожар“,
велат од ОЈО Гостивар.