„Во текот на првичната истражна работа, на местото на авионската несреќа беа пронајдени телата на 10 жртви. Се вршат молекуларно-генетски анализи за да се утврди нивниот идентитет“, се наведува во соопштението на рускиот Истражен комитет, во кое се додава дека е пронајдени и црната кутија, пренесува Гардијан
Русија денеска соопшти дека се пројдени десет тела и црната кутија од местото на авионската несреќа што се случи пред два дена и во која се верува дека меѓу загинатите е и шефот на платеничката група „Вагнер“ Евгениј Пригожин, пренесува Гардијан.
Имено, во тек е истрага која треба да ги утврди причините за авионската несреќа, која се случи во средата, точно два месеци по краткотрајниот бунт на групата „Вагнер“ против военото раководство на Москва, што го вознемири Кремљ.
„Во текот на првичната истражна работа, на местото на авионската несреќа беа пронајдени телата на 10 жртви. Се вршат молекуларно-генетски анализи за да се утврди нивниот идентитет“,
се наведува во соопштението на рускиот Истражен комитет, во кое се додава дека се пронајдени и црната кутија, пренесува британскиот весник.
Бројот на пронајдени тела соодвествува со меморандумот, односно списокот на патници кој беше објавен по несреќата.
Руската новинска агенција ТАСС соопшти дека во авионот покрај Пригожин биле и неговата десна рака Дмитри Уткин, исто така еден од основачите на „Вагнер“, Сергеј Пропустин, Евгениј Макаријан, Александар Тотмин, Валери Чекалов, Николај Матјусеев и тројца членови на екипажот – пилотот на авионот Алексеј Левшин, копилотот Рустам Каримов и стјуардесата Кристина Распопова.
Авионот кој се урна во регионот Твер, додека летал од Москва кон Санкт Петерсбург предизвика бројни шпекулации околу причините за неговиот пад.
Портпаролот на Кремљ, Дмитриј Песков, денеска ги коментираше наводите дека рускиот претседател Владимир Путин наредил соборување на авионот во кој се наоѓал водачот на „Вагнер“, Евгениј Пригожин.
Тој ги оцени ваквите тврдења како лага, посочувајќи дека мора да се расчистат фактите за авионската несреќа и дека претседателот Путин ги чека резултатите од истрагата која, како што рече, ќе биде завршена во догледно време.
„На Запад сите овие шпекулации доаѓаат од одреден агол. Но, сето тоа е лага… Сега ќе се направат сите потребни тестови, вклучително и генетските тестови. Резултатите ќе бидат објавени веднаш штом ќе бидат готови“,
рече денеска Песков во изјава за медиумите.
Портпаролот на Пентагон, Пет Рајдер, денеска соопшти дека САД немаат индиции дека авионот на шефот на руската паравоена група „Вагнер“ бил соборен со ракети земја-воздух.
„Оценуваме дека таквите информации се неточни. Јасно е дека знаеме дека групата ‘Вагнер’ има многу пипала, некои од воена природа, некои од криминална природа, во Африка. Мислам дека никој нема да ја намали опасноста од таа група или нејзините остатоци“,
рече Рајдер додавајќи дека Пентагон верува дека Пригожин е мртов, но дека тоа сè уште не е потврдено.
Во телевизиското видеообраќање, кое го пренесе Би-би-си, рускиот претседател Владимир Путин вчера изрази сочувство до семејствата на сите загинати во авионската несреќа, но директно не потврди дека меѓу жртвите е и шефот на „Вагнер“. Сепак, кажа дека прелиминарните информации говорат за присуство на членови на платеничката група во авионот што се урна завчера северно од Москва, а во кој нема преживеани.
„Ако членови од групата ‘Вагнер’ беа таму, а прелиминарните податоци покажуваат дека биле, би сакал да забележам дека овие луѓе дадоа значаен придонес во нашата заедничка кауза за борба против неонацистичкиот режим во Украина. Го паметиме и нема да го заборавиме тоа“,
рече Путин во обраќањето до јавноста.
Во обраќањето рускиот претседател го опиша шефот на „Вагнер“ како „талентиран бизнисмен, но, и како „човек со тепка судбина кој правел големи грешки во животот.
Белорускиот претседател Александар Лукашенко денеска изјави дека членовите на платеничката група „Вагнер“ ќе останат во земјата, каде беа сместени по бунтот во Русија пред два месеци.
Лукашенко изјави дека во следните неколку дена до 10 000 борци на Вагнер ќе бидат во главниот камп на групата во Осиповичи, југоисточно од Минск, пренесе Би-би-си.