Песков посочи дека мора да се расчистат фактите за авионската несреќа и дека претседателот ги чека резултатите од истрагата, која ќе биде завршена во догледно време
Портпаролот на Кремљ, Дмитриј Песков, денеска ги коментираше наводите дека рускиот претседател Владимир Путин наредил соборување на авионот во кој се наоѓал водачот на „Вагнер“, Евгениј Пригожин.
„Путин во последните денови не се сретнал со Евгениј Пригожин во Кремљ“,
рече Песков.
Тој се согласува дека има многу шпекулации за оваа несреќа, пишува ТАСС.
„На Запад сите овие шпекулации доаѓаат од одреден агол. Но, сето тоа е лага“,
додаде тој.
Песков посочи дека мора да се расчистат фактите за авионската несреќа и дека претседателот ги чека резултатите од истрагата, која ќе биде завршена во догледно време.
„Сега ќе се направат сите потребни тестови, вклучително и генетските тестови. Резултатите ќе бидат објавени веднаш штом ќе бидат готови“,
рече Песков.
Портпаролот на Пентагон, Пет Рајдер, денеска соопшти дека САД немаат индиции дека авионот на шефот на руската паравоена група „Вагнер“, Евгениј Пригожин, кој се урна во средата во руската област Твер, бил соборен со ракети земја-воздух.
„Оценуваме дека таквите информации се неточни. Јасно е дека знаеме дека групата ‘Вагнер’ има многу пипала, некои од воена природа, некои од криминална природа, во Африка. Мислам дека никој нема да ја намали опасноста од таа група или нејзините остатоци“,
рекол Рајдер и додал дека Пентагон верува дека Пригожин е мртов, но дека тоа сè уште не е потврдено, пренесува „Гардијан“.