Во последното деноноќие во Дебар не се регистрирани новозаразени со ковид-19, информираше општинскиот Оперативен штаб.
„Според лабораториски резултати за денеска, Дебар нема нови случаи заразени со ковид-19. Почитувајте ги препораките, се’ уште не е крај“, пишува во објавата на профилот на штабот на Фејсбук.
Ова е втор ден по ред како нема новозаразени во оваа општина, по двата случаи кои беа потврдени во четвртокот,откако немаше новозаразени 12 дена.
Вкупната бројка на заразени е 51 лице, од кои две лица се од Општина Центар Жупа. Над 60 отсто од нив се оздравени, додека четири лица починаа, од кои три лица од Дебар и едно од Центар Жупа.
Од Оперативниот штаб информираа и дека безбедносната состојба на подрачјето на двете општини е стабилна, при што не се регистрирани никакви прекршувања.