„Немам коментар. Пречесто некако коментираме, па пречесто експертите ги коментираат нашите коментари. Јас немам што да кажам ниту, пак, да дополнам на тоа што се случува. Да видиме како ќе работи“, рече премиерот Христијан Мицкоски прашан за коментар во врска со изборот на новиот претседател на Судскиот совет
Да видиме како ќе работи – рече кусо премиерот Христијан Мицкоски во врска со изборот на судијата Александар Камбовски за нов претседател на Судскиот совет.
Одговарајќи на новинарски прашања по пуштањето во употреба на реконструираната спортска сала „25 Мај“ во Радовиш, премиерот беше прашан како го коментира изборот на новиот претседател на Судскиот совет, што следува точно еден месец откако претходната претседателка Весна Дамева поднесе оставка од функцијата.
„Немам коментар. Пречесто некако коментираме, па пречесто експертите ги коментираат нашите коментари. Јас немам што да кажам ниту, пак, да дополнам на тоа што се случува. Да видиме како ќе работи новиот претседател на Судскиот совет“,
рече Мицкоски во изјавата.
На денешната седница на Судскиот совет, прва во новата година, судијата од Апелацискиот суд Битола, Александар Камбовски, едногласно беше избран за нов претседател на ова тело. Поддршка за изборот, Камбовски доби од сите 13 члена на Судскиот совет со право на глас. Освен него, немаше други предлози за највисоката функција во Судскиот совет. Целата постапка заврши релативно брзо, за помалку од половина час.
Во својата прва изјава пред новинарите како претседател на Советот, Камбовски порача дека институцијата ќе се води со интегритет, непристрасност и максимални напори за заштита на судската независност на сите судии во државата. Рече дека судиите што не работат согласно законот и Уставот, туку за свои лични интереси и под туѓи влијанија, ќе се соочат со одговорност, а максимална поддршка ќе добијат оние што работат чесно.