По предизвикот „Супермен“, кој се појави на социјалната мрежа, во последните 24 часа има повеќе повредени деца во Скопје и другите градови
ЛДП најостро го осудува неодговорното и неконтролирано ширење содржини на социјалните мрежи, како што е последниот предизвик на Тик-ток, познат како „Супермен“, кој само во последните 24 часа резултира со повреди кај уште шест деца во Скопје и други градови низ Македонија.
Од партијата посочуваат дека најмладиот од повредените има само 10 години, а најстариот 17 години.
„Овие податоци не се само загрижувачки, туку алармантни. Децата, нашата најранлива категорија, стануваат жртви на опасни игри кои се пласираат преку социјалните мрежи. Тие содржини, под маската на ‘забава’, претставуваат сериозна закана за нивното физичко и ментално здравје, а ние како општество мора да преземеме одговорност и да ги спречиме ваквите несреќи“,
се вели во реакцијата на Либерално-демократската партија.
ЛДП смета дека немањето соодветна контрола врз содржините кои се достапни на социјалните мрежи овозможува ваквите „игри“ да стигнат до најранливите корисници и тоа е директен удар колективната одговорност како политички партии, како родители, како институции, но и генерално како општество.
ЛДП потсетува на предлогот кој минатата година го достави до Министерството за образование и наука непосредно по немилите настани во соседна Србија, а со кој се бара контрола на содржината која се емитува на социјалните мрежи, како и забрана на содржините кои поттикнуваат насилство.
„Затоа бараме итно регулирање на содржините на социјалните мрежи со воведување на мерки за забрана на оние кои поттикнуваат насилство и саморазорувачко однесување, зголемување на надзорот и воведување санкции за платформи кои овозможуваат опасни содржини достапни за малолетници. Време е да се освестиме како општество и да не дозволиме уште едно дете да биде жртва на вакви опасни игри. Нашите најмлади заслужуваат детство исполнето со радост, а не со страв и последици од несреќни трендови“,
велат од ЛДП.