Според Чулев, 85-часовниот полициски час кој беше воведен за велигденските празници имал негативно влијание врз луѓето
Техничкиот министер за внатрешни работи Наќе Чулев на својот профил на Фејсбук информира дека предложил до Владата намалување на полицискиот час, кој најверојатно ќе почнува од 19 часот и ќе трае до 05 часот наутро.
Освен ова вели, побарал и преиспитување на одлуките со кои се забранува движење во планини и шуми.
„Имајќи ги предвид статистичките податоци кои се однесуваат на лицата кај кои е утврдено присуство на корона вирусот кои имаат надолна тенденција и фактот дека зад нас е ограничување на движење кое траеше цели 85 часа и кое покрај превентивна здравствена улога, имаше негативно влијание на психосоцијалната состојба кај граѓаните ја информирам јавноста дека утрово на седницата на кризниот штаб во рамките на владата предложив итно и неодложно намалување на времетраењето на ограничувањето на движењето за граѓаните“,
вели Чулев.
Неговите барања вели се однесуваат на сите граѓани без разлика на возраста и ја повика Владата на следната седница да ги прифати предлозите.
Дека кризниот штаб на Владата ја рагледува опцијата полицискиот час да почнува од 19 наместо од 16 часот, информираше и вицепремиерот Бујар Османи.