Министерот за внатрешни работи Наќе Чулев, заедно со дополнителниот заменик-министер за внатрешни работи Славјанка Петровска и директорот на Бирото за јавна безбедност Сашо Тасевски, денеска во Битола ја одбележа 19-годишнината од загинувањето на бранителите во 2001 година кај тетовското село Вејце.
Придружувани од претставници на други организациски единици на МВР, Чулев, Петровска и Тасевски положија цвеќе пред споменикот „Ангел“ кај Градскиот часовник во Битола, како и во кругот на СВР Битола.
„Со положување цвеќе, ја одбележаа 19-годишнината од херојската смрт на четворицата припадници на Посебната единица при СВР Битола – Марјан Божиновски, Илче Стојановски, Кире Костадиновски и Бошко Најдовски, како и на четворицата припадници на армиската единица ‘Волци’ – Роберт Петковски, Бобан Трајковски, Игор Крстевски и Миле Јаневски, коишто ги положија своите животи во одбрана на татковината на денешен ден во 2001 година кај тетовското село Вејце“,
информира МВР.
На комеморативното одбележување на трагичното загинување на овие македонски херои учествуваа и претставници на локалната самоуправа на Битола, на политичките партии, како и на семејствата на загинатите бранители.
„Со овој чин не само што се оддава должната почит кон огромната, неспоредливо најголема жртва на нашите бранители, туку се испраќа и јасна порака дека хероите никогаш не умираат, тие вечно живеат во нашите животи“,
истакна Чулев.
Тој, исто така, нагласи дека Министерството за внатрешни работи, во рамки на своите можности, и натаму ќе остане отворено за семејствата на загинатите бранители, за бранителските организации и секогаш ќе им излезе во пресрет на нивните барања и потреби.