Техничкиот министер за внатрешни работи Наќе Чулев реагираше на денешната изјава на министерката за финансии Нина Ангеловска, која рече дека неговиот предлог за награда на полицајците од 15 000 денари не е во согласност со ребалансот на буџетот од пред два дена.
„Во врска со денешната изјава на министерката Ангеловска дека предлогот за кратење е доставен од моја страна, напоменувам дека досега од буџетот на МВР се скратени околу 5 милиони евра и кратењето е направено на барање на Министерството за финансии, а за потребите на ребалансот на буџетот. Ова кратење го направивме во најголем дел од ставката ’капитални расходи‘ и ’стоки и услуги‘ за истото да има најмал негативен ефект врз вработените во МВР. Свесен сум дека пандемијата поврзана со ковид-19 сериозно ги намали приходите во буџетот, но исто така убеден сум дека оваа награда е повеќе од заслужена и истата ќе влијае мотивирачки врз понатамошниот ангажман на полициските службеници поврзан со коронавирусот“,
вели Чулев.
Тој во објавата на социјалните мрежи го нападна неговиот претходник во Министерството, а во моментов актуелен технички премиер Оливер Спасовски, дека не води грижа за полицајците.
„Токму Оливер Спасовски во изминатиот период постојано потенцираше дека стандардот на полициските службеници е важен, но веројатно само кога тој е на чело на Министерството за внатрешни работи. Грижата за нив и за нивните плати заврши во моментот кога тој замина од Министерството за внатрешни работи. За Оливер Спасовски и министрите во Владата маргинален е фактот дека полициските службеници, деноноќно и неуморно застанаа во одбрана на здравјето на граѓаните на нашата држава“,
вели Чулев.
Тој ги повикува и полициските синдикати да реагираат.