Братот на Мартин Јовановски, третиот Македонец кој исчезна во водите на Егејското море кај Посиди на социјалните мрежи упати нов апел за помош со мапа од локацијата каде е пронајден неговиот пријател Иван.
„Драги пријатели кои сте на Халкидики, големи се шансите Мартин да биде и на таа страна на Халкидики. Ги замолуваме сите со чамци, двоглед или други уреди за зумирање да ни помогнат и да бидат дел од потрагата по Мартин. Секоја мала помош е многу потребна и ценета“,
алармира Горан Јовановски, братот на исчезнатиот Мартин.
Тој побара, доколку се во можност сите да ја споделат неговата објава, нагласувајќи дека иако поминаа 4 дена, тој, неговото семејство и сите вклучени во потрагата не ја губат надежта дека Мартин ќе биде најден.
Продолжувањето на спасувачката операција беше доведено под знак прашалник, бидејќи според грчките закони таа требаше да заврши денеска, на четвртиот ден. Македонските власти одговорија на неговото барање таа да продолжи, па откако шефот на македонската дипломатија Бујар Османи разговараше до неговиот колега Никос Дендиас, грчките спасувачки служби и покрај изминатиот редовен рок, решија операцијата за спасување на Мартин да не застанува.
„Посебна благодарност до ОФКАТ, волонтерите кои помогнаа во потрагата, Генералниот конзулат во Солун, г. Бујар Османи и г. Никос Дендиас, локалите и сите кои последните 4 дена ни помогнаа во потрагата по Мартин“,
пишува Горан на својот профил на Фејсбук.