Врховниот суд на Бразил веднаш по неговото обраќање, објави соопштение во кое наведе дека со тоа што Болсонаро одобрил да започне транзицијата на власта, тој го признал резултатот од изборите
Екстремно десничарскиот претседател на Бразил, Жаир Болсонаро, го прекина молкот откако беше поразен на изборите во неделата од неговиот противкандидат Луис Инасио Лула да Силва.
Тој им се заблагодари на избирачите што гласале за него во неделата, но не го призна поразот. Меѓутоа, не го ни оспори резултатот.
Иако не призна дека изгуби, веќе ја почнал процедурата за примопредавање на власта.
Појавувањето на претседателот во заминување е дури 44 часа по објавувањето на резултати, а неговото обраќање траеше само две минути при што не дозволи прашања од новинарите.
По неговата кратка изјава, шефот на неговиот кабинет Чиро Ногуеира, пред новинарите рече дека Болсонаро ќе започне со процесот на транзиција на власта.
Врховниот суд на Бразил веднаш по неговото обраќање, објави соопштение во кое наведе дека со тоа што Болсонаро одобрил да започне транзицијата на власта, тој го признал резултатот од изборите.
Изјавите на бразилскиот претседател во пресрет на изборите во тамошната јавност претходно го наметнаа стравот дека ќе нема мирна транзиција. Една од нив беше, на пример, таа дека само Бог може да го отстрани од функцијата. Исто така, тој постојано искажуваше и неосновани сомнежи за гласачкиот систем во Бразил.
Во денешната изјава, тој воопшто не го спомена неговиот противкандидат Луис да Силва, а се осврна и на неговите поддржувачи кои одбивајќи да го прифатат поразот ги блокираа патиштата во речиси сите бразилски држави, освен во две. Болсонаро ги оправда велејќи дека ваквите реакции се плод на огорченост и чувство на неправда за тоа како се одвивал изборниот процес.