Пожарот кај селото Србица е на нива, додека во Бајково, на планината Огражден, гори ниска вегетација и мешана шума
Два пожари се регистрирани денеска до 13 часот, информираат од Центарот за управување со кризи (ЦУК).
Од ЦУК велат дека еден од регистрираните пожари е активен, а другиот е ставен под контрола.
Активен е пожарот на нива во селото Србица во Општина Кочани.
Пожарот кај селото Бајково на планината Огражден во Општина Ново Село е под контрола. Тука, како што велат од ЦУК, гори ниска вегетација и мешана шума.
Инаку, овој пожар е активен веќе трет ден, а откако вчера наутро беше ставен под контрола, синоќа повторно се разгоре. Во неговото гаснење се вклучија три „ертрактори“ на Дирекцијата за заштита и спасување.
Овој пожар во вторникот беше предизвик за струмичките пожарникари бидејќи постоеше зголемена опасност од негово ширење кон црквата „Св. Петар и Павле“.
Откако пожарот беше ставен под контрола, од ТППЕ Струмица информираа дека со навремена интервенција успеале да спасат повеќе куќи, како и црквата иако огнот веќе бил стигнат до самите објекти.