Медиумски работник кој работел во телевизиски куќи во Македонија и во Србија, мултимедијална личност и интерпретатор, борец за човекови права кој и самиот бил цел на дискриминација, човек кој легално заработува од својата 15. година, прокурист на 1ТВ…
Вака Бојан Јовановски-Боки 13 денеска се претстави во судницата во Основниот кривичен суд во Скопје каде што почна да сведочи за предметот „Рекет“, во кој е првообвинет.
За Катица Јанева рече дека ја запознал во септември 2018 година кога ја барал да ја убеди да гостува во емисијата „Лице“ на Анета Кочишки за да ја раскаже својата животна приказна, но таа одбила, а за предметот „Рекет“ рече дека е конструиран за спас на Орце Камчев и за рушење на СЈО и на Катица Јанева која им пречела и на власта и на опозицијата.
„Катица Јанева е народна жена, исклучително чесна, професионална, жена каква немам видено во светот на медиумите каде што сум видел разни профили на луѓе. Примерот на Катица е сосема различен од другите, беше непосредна, либерална. Со неа сум разговарал на теми за мода, семејни работи, љубовни работи, немала предрасуда за мојата сексуална определба, а сум бил многу пати предмет на дискриминација. Ние имавме премиер кој ме нарече педер“,
рече Боки нагласувајќи дека никогаш немал ниту е можно како обичен цивил да има има претпоставено или реално влијание врз обвинител кој „коси и тресе“.
Конкретно за предметот „Империја“, рече дека се запознал со списите во текот на овој судски процес кога биле презентирани во судница.
За разлика од Катица, која била порeзервирана во давањето информации, рече дека Вилма Русковска често го брифирала.
„Имаме опозитна состојба каде што јас сум бил директно брифиран од Вилма Русковска за нејзините дејствија и за тоа кога и кој ден ќе повикува. Имаме ситуација кога Вилма ми вели: ‘Задолжително пушти новинар, овој ми е одвратен мора да го снимаат. Кој? Експретседателот на Судскиот совет’“,
рече Боки напаѓајќи ја Русковска дека имала отворен анимозитет кон Јанева, што е уште една причина, според него, за отворање на случајот „Рекет“.
Тој почна да споделува и детали од средби со Русковска во неговата канцеларија, алудирајќи дека биле многу отворени во разговорите, се пиело кафе и алкохол, како што рече, „домаќински“, нагласувајќи дека тој не е оној што пиел алкохол.
Неговите обвинувања одеа дотаму што ја обвини и за корупција и за директна поврзаност со случајот „Дијамед“, за кој рече е директен сведок.
Обвинителката Вилма Русковска, пак, реагираше до судот да го предупреди и порача дека ако некој има докази против неа или кој и да е, има институции каде да се пријави, а не на ваков начин да се плука.
Боки обвинувања упати и затоа што не му е направено вештачење на телефонот во целост.
„Чевлите за тангото кое го играм е мојот мобилен апарат“,
рече Боки.
*Поврзани вести
Судот одби Заев, ексдиректорот на УБК и уредници од 1 ТВ да сведочат во „Рекет“
„Рекет“: Катица Јанева го тужела Боки за неовластено снимање