Бојан Јовановски-Боки 13 бараше, но судот одби во дополнението на доказната постапка за „Рекет“ како сведоци да бидат повикани поранешниот премиер Зоран Заев, ексдиректорот на Управата за безбедност и контраразузнавање (УБК), Горан Николовски, како и уредници од 1 ТВ. Покрај овие сведоци, беа одбиени и дел од материјалните докази.
Образложението за поголем дел од доказите беше дека одбраната можела и требала да ги предложи претходно, односно на првата листа на докази.
Боки и неговиот адвокат Сашко Дукоски бараа Зоран Заев да сведочи бидејќи меѓу доказите на обвинителството што беа презентирани имаше пораки помеѓу Јовановски и експремиерот, кои обвинетиот како скриншотови ѝ ги препраќал на мајка си, а од кои можеше да се прочита дека, меѓу другото, Заев пишува дека ги видел доказите и дека станува збор за чист рекет.
Дуковски, во изјава за медиумите, посочи дека не го предложиле претходно Заев како сведок бидејќи сметале дека ќе произлезе нешто од вештачењето на мобилниот телефон на Јовановски. Но, тврди, вештачење воопшто не било направено, а на минатото рочиште како вештак се појавило лице од ИТ-индустријата кое нема лиценца за вештак ниту, пак, има неговата фирма, а во судница тоа лице, тврди Дуковски, кажало дека не го вештачело телефонот туку само три слики.
Покрај Заев, од листата што адвокатот ја држеше во рака пред новинарите можеа да се прочитаат и имињата на Оливер Спасовски, Радмила Шекеринска и Венко Филипче.
Од листата, пак, Дуковски јавно го прочита и името на ексдиректорот на УКБ, Горан Николовски, а барањето тој да сведочи произлегува од исказот на Ана Камчева каде што таа кажува дека се советувала со него што да прави кога ѝ биле побарани пари.
Уредниците во телевизијата на Боки, Ацо Кабранов, Гордана Дувњак, Анета Кочишки… исто така беа предложени од страна на Боки, но беа одбиени од судот.
Адвокатот, во изјавата пред медиумите, обвини за брутално кршење на правото на еднаквост во постапката и двојни аршини алудирајќи дека судот прифатил сѐ што било предложено од страна на обвинителството, меѓу што и сведочењето на новинарот од 1 ТВ Христијан Беневски, кое смета дека нема поврзаност со случајот.
Во врска со споменатиот телефон, барањето за вештачење исто така беше одбиено. Судот не ги прифати ниту снимките што се појавија на Јутјуб на почетокот на декември лани, а во кои се слуша гласот на Орце Камчев.
„Тие снимки со Камчев се објавени на 6 декември, како сме можеле да знаеме и да ги предложиме во првичната листа на докази кога веќе претходно ја имавме поднесено, обвинението беше прифатено и судењето започна на 3 декември“,
рече Дуковски.
Истите снимки ги предлагаа и адвокатите на Јанева, а судијката Васка Николовска-Масевска рече дека таквото објаснување тие не го навеле во барањето за изведување на снимките како дополнителни докази. Таа им посочи дека решението е веќе донесено и немаат право на жалби, но оти тоа ќе можат да го наведат во жалбата на пресудата ако таа биде осудителна.
Бурно реагираше и обвинетиот Бојан Јовановски, кој неколкупати бараше збор и прашуваше дали пресудата е веќе донесена и сега само се прелетува низ предметот.
„Каде летаме, судијке?“, праша Јовановски.
Судијката не му даде збор и посочи дека ќе има цел ден за зборување на 7 мај, кога е предвидено тој самиот да сведочи и да дава одбрана.
Потоа, за наредните рочишта, ќе остане и Јанева да ја даде својата одбрана, како и странките да ги кажат своите завршни зборови.