Градоначалникот на Општина Центар, Саша Богдановиќ, вели дека не знае зошто конкретно била незадоволна експретседателката на Советот, Јана Белчева-Андреевска, која самоиницијативно се повлече од функцијата.
Според Богдановиќ, таа имала целосна поддршка во сите активности и вели дека е очекувано во текот на работата да има одредени несогласувања.
„Нормално дека во секоја работа има одредени усогласувања и несогласувања, начини на размислувања итн. Досега, за најголемиот дел од одлуките, вклучувајќи ја и најголемата одлука на Советот за мораториумот за градби, сме докажале дека имаме исти ставови и принципи. Но, начинот на кој ние функционираме и потоа ги практивуваме сите одлуки гледаме да бидат во согласност со сите законски уредби и прописи итн. Јас не знам конкретно за кои работи не е задоволна сегашната само советничка Белчева-Андреевска, целосната поддршка ја има добиено во сите активности што се спроведени, нормално за некои работи што сме сметале – сме давале одредени забелешки“,
изјави Богдановиќ.
Таа, пак, во својата оставка како причини за нејзината одлука за повлекување од функцијата ги наведува „непремостливите разлики со актуелното мнозинство и раководство на Општина Центар, а особено со градоначалникот“.
Според неа, Општина Центар е локална самоуправа без стратегија, јасни цели и со измешани приоритет, а во Советот седат партиски членови без интерес за напредок.
Посочува дека се одлучила да даде оставка бидејќи не сака да биде ничие покритие дека се соработува со граѓанскиот сектор.