Блинкен, во текот на оваа недела, ќе ги посети Саудиска Арабија и Египет за да се состане со лидерите на овие земји и да разговара за напорите за постигнување „итен договор за прекин на огнот“ меѓу Израел и Хамас, пренесува Си-ен-ен
Американскиот државен секретар Ентони Блинкен се надева дека сепак ќе биде договорен прекин на огнот меѓу Израел и Хамас, како и ослободување на заложниците кои ги зеде палестинското исламистичко движење во нападот врз еврејската држава на 7 октомври, пренесуваат британските медиуми.
Блинкен, во текот на оваа недела, ќе ги посети Саудиска Арабија и Египет за да се состане со лидерите на овие земји и да разговара за напорите за постигнување итен договор за прекин на огнот меѓу Израел и Хамас, пренесува Си-ен-ен повикувајќи се на Стејт департментот.
Според Стејт департментот, договорот ќе обезбеди ослободување на заложниците кои Хамас ги зеде за време на нападот врз Израел на 7 октомври.
„Договорот, исто така, ќе обезбеди „засилени меѓународни напори за зголемување на хуманитарната помош за Газа и координација за постконфликтно планирање за Газа, вклучително и обезбедување дека Хамас повеќе нема да може да управува или да ги повторува нападите од 7-ми октомври“,
соопштуваат од Стејт департментот.
Блинкен, исто така, планира да разговара за тоа како да се стави крај на нападите на хутите врз трговските бродови во Црвеното Море и Аденскиот Залив.
Нови преговори за прекин на огнот во Појасот Газа и ослободување на заложниците кои ги држеше Хамас почнаа вчера во Доха, пренесува ДПА.
Блинкен моментално присуствува на самитот за демократија во Јужна Кореја, а денеска се очекува да се сретне со министерот за надворешни работи и со претседателот на Филипините.