Управувањето со органски отпад е важно прашање за заштита на животната средина и е една од најсложените области во однос на усогласување со регулативите на Европската Унија, порача вицепремиерот за европски прашања Бојан Маричиќ, во однос на проектот Симбиозис кој се спроведува со поддршка на ЕУ преку ИПА програма.
„Проектот Симбиозис отвори нова страница во управувањето со органскиот отпад во општина Битола, за која отпадот денес е ресурс, бидејќи започна со селективно собирање на органскиот отпад кој нема да го „фрла“ туку ќе го преработува, и од него ќе добие компост кој ќе го користи како ѓубриво во своите расадници и на јавните зелени површини, со поддршка од европските ИПА програми“
напиша Маричиќ на „Фејсбук“.
Како што наведе првиот човек на СЕП, Симбиозис (2018-2020), не е само придобивка во заштитата на животната средина, туку дава и конкретни социјални придобивки за локалните заедници преку подобро искористување на био ресурсите од прехрамбената индустрија во корист на општествените активности и создавањето нови работни места, како и подобрување на соработката помеѓу секторите и бизнисите во прекуграничната област, а со тоа да се подобрат локалните економии и да се поттикне претприемништвото.
„Симбиотски мрежи за одржливо управување со органскиот отпад-Симбиоза“, е поддржан од Европската Унија преку ИПА Програмата за прекугранична соработка “Грција – Поранешна Југословенска Република Македонија 2014-2020”, кофинансиран од националните фондови преку Министерството за Локална самоуправа, во вредност од 898.858,33 € , а водечки партнер е ЈП КОМУНАЛЕЦ Битола.
Вкупниот буџет на ИПА Програмата за прекугранична соработка со Грција 2014-2020 изнесува 45.470.066 евра ЕУ и национално финансирање, а скоро половината, 22.735.032 евра се искористени во проекти од втората приоритетна оска – Заштита на животната средина-транспорт.
„Нашиот ангажман, кога станува збор за постигнување на целите од Европскиот зелен договор, е клучен за процесот на европска интеграција и ќе придонесе за поефикасно користење на ресурсите. Целта ни е транзиција кон чиста, кружна економија и мерките за запирање на климатските промени, истовремено обновување на биолошката разновидност и намалување на загадувањето, ќе ја поддржат економијата и ќе отворат нови работни места“
порача Маричиќ.